Brighton khelmualah tlawm hlim Liverpool

Premier League champion Liverpool chu Champions League-a an mualpho hnu lawkah zanin dar 6:00 hian league match khel turin an inlan dawn a, khualmualah Brighton & Hove Albion an lenchilh ang. 

Reds hian player dam kim lo chungin Leicester City lakah game mawi an chhawp chhuak a, 3-0 in an chak. Mahse, fan-te hlim au thawm pawh a reh fel hmain Anfield-ah Atalanta chu 2-0 in an ngam lo a, an mualpho. 

Zaninah Liverpool fan-ten chak result-ah lo chuan lawmna an hmu lo ang tih a chiang a, point thum aia tlema lungawi an tum dawn lo - inkhel a hmuhnawm 

dawn. 

Jurgen Klopp-a'n player inhliam a ngah a, hei vang hian an ṭhat dan berin Atalanta an hmachhawn lo. Zaninah erawh German coach tan inkhekna chi a ni lo a, Reds-in an player neih ṭhat ber nen Brighton an hmachhawn ang. 

Atalanta laka bul ṭan Mohamed Salah-a'n Brighton lakah bul a ṭan beisei a ni a, he club hi Premier League-a vawi ruk a hmachhawnah goal nga a khung a, assist vawi thum a nei - goal khung leh ngei a tum dawn.

Diogo Jota-a'n Atalanta laka bul a ṭan loh chhan kha Brighton tana khek a nih vang niin a lang a, chuti a nih chuan Sadio Mane leh Roberto Firmino nen Klopp-a'n tlarhmaah a player chhuanvawr pali a khelhtir leh dawn tihna a ni. 

Liverpool captain Jordan Henderson-a'n club training a zawm leh tawh avangin zaninah inlan thei tura beisei a ni a, Trent Alexander-Arnold, Thiago Alcantara, Naby Keita, Alex Oxlade-Chamberlain leh Xherdan Shaqiri-te chu an inlan aiin an inlan theih loh a rinawm zawk. 

Atalanta lakah Klopp-a'n tlarhnung a rem sual tih a inhre tawh a, zaninah chuan Joel Matip kawp turin Fabinho a lut ang a, Andy Robertson a lo kir ang a, James Milner-a'n right back hna a thawk leh bawk a nih pawhin a mak lo ang. 

Brighton tan Villa laka hnawhchhuah Tariq Lamptey chu hrem vangin a inlan thei dawn lo a, he thu buatsaih lai hian Liverpool midfielder hlui Adam Lallana dinhmun a la chiang lo bawk - Villa laka goal khungtu Danny Welbeck an nei tih erawh hriat tel a ṭha.