LeBron James a danglam dawn lo

Los Angeles Lakers star LeBron James chuan NBA season an ṭan leh hunah pawh a jersey hnungah thu ziah lan a tum ve lem loh thu a sawi, a kal dan pangngain James a kal dawn.

US-a mihang pakhat thihnain khawvel a deng chhuak a, infiamna khawvelah pawh chi inthliarna an duh lohzia an lantir nasa hle - NBA lam pawhin an kalpui dawn a, player-te chu zalenna zau tak an pe. July thla tawp hian NBA an khel chhunzawm leh dawn, hetih hunah hian player-te chu an jersey hnung lamah inpumkhatna leh chi inthliarna an duh lohzia lantirna thu ziah phalsak an ni. NBA-in thu ziah a phal zingah Black Lives Matter; Say Their Names; I Can't Breathe leh Respect Us te chu a langsar an ni.

James chuan, "Ka nihna, thil tum leh hmabak ti lang tur hian ka jersey hnung lamah thu ka ziah lan kher a ngaihna ka hre lo," tiin a sawi. Player ṭhenkhatin thu ziak an nem kai a nih chuan an duh thu a ni a, a pawmpui thu a sawi tel bawk. Champion tura rinkai Lakers hian hripui coronavirus vanga an chawlh hnua an match hmasa atan July 30 hian Los Angeles Clippers an hmachhawn ang. Inelna hi ESPN Wide World of Sports Complex, Florida-ah vek neih tur a ni tawh ang.