Engthawl taka awm a pawimawh–Sindhu

Badminton world champion PV Sindhu chuan coronavirus vanga inkhelh theih loh chu a khawhar thlak thu a sawi a, inkharkhip boruak rit tak karah pawh a êng lam thlir thiam a pawimawh thu a sawi bawk.

Kum 24 mi Sindhu chuan, "Nunphung hi a pangngaiin kal ni se la chuan Olympic kan khel ṭep tawh ang, thla hnih hnu vel lekah inelna lian hmachhawn tur kan ni. Mahse tunah erawh chutiangin thil a thleng ta si lo.

"Mahni awm hmunah dawhthei taka kan awm a ngai a, player mai ni loin a thei thei chuan taksa hrisel nan taksa sawizawi a pawimawh. A lan dan chuan September thla hian Taipe-ah inelna a awm dawn, chumi atan chuan inpeih hman ngei ka tum," a ti.

Rio Olympic gold medalist hian nikum khan world championship-ah hlawlhtlinna a chang, kumin hi Olympic neih kum a nih avangin world championship hi neih loh tur a ni a; hri leng vangin Olympic chu nakkum atan an sawn leh ta si–Sindhu hian world title a kawl rei phah.