Nadal-a'n Federer a el lo

Rafael Nadal chuan Roger Federer-a Grand Slam nomawi chawi zat chawi ve kher chu a thil tum a nih loh thu a sawi a, chutihrualin inelna an hmachhawn leh tur apiangah a ṭha thei ang bera khelh a tum.

Major title 20 la tawh Federer hi kum 38 mi a ni, season kal laiah a inlan dawn tawh lo. Kum 34 mi Nadal-a'n nomawi lian 19 a nei tawh thung a, a inthlauhna a tam lo hle - Spanish tlangval hian kuminah pawh tluk thei dinhmunah a ding.

Nadal chuan, "Roger-a nomawi chawi zat chawi kher hi ka thil tum a ni lo, nuamti leh zalen taka tennis khelh hi kei chuan ka duh ber a ni mai. Duhthusam thleng dik thei dawn se chuan Grand Slam vawi 25 champion nih thleng kan duh vek ang, mahse duh ang diak diakin thil a kal thei ngai lo," a ti.

Tunah chuan Majorca, Spain-ah Nadal hian chhungkua in hun a hmang mek. US Open leh French Open khelh hun a inhnaih vanga a rilru a buai thu pawh a lo sawi tawh, tun thlengin thutlukna la siam lo mah se duh thlang tur a nih chuan clay court lamah a inlan a rinawm zawk.