Prague leh Lexington inelna awm dawn

Hmeichhe tennis thuneitu sang Women's Tennis Association chuan season an hman chhunzawm dan tur an thlifim chho zel a, Prague leh Lexington Open te chu Czech Republic leh United States-ah khelh a nih tur thu an tichiang.

March thla aṭang khan coronavirus leng vangin WTA hnuaia inelna zawng zawng chawlh lailawk vek a ni. Beisei dan chuan August 3 aṭang hian Palermo-ah inelna a awm ṭan leh ang, season kal laia tournament khelh tura an beisei chu 21 a ni.

WTA chairman Steve Simon chuan, "Thla thum chuang kan chawl tawh a, tunah hian beiseina nen hma hun kan thlir mek. Hripui a len hnuah Prague leh Lexington ten inelna an thleng thei ve leh dawn tih hi chanchin lawmawm a ni," a ti. Grand Slam pali zingah Australian Open chauh an la khel a, US Open leh French Open an la beisei mek bawk. Wimbledon bakah grass court inelna dang zawng zawng chu kuminah neih theih a ni lo.