Mizoram hmaah Kerala
Mizoramin Pathianni tlai dar 4:00 khian Tilak Maidan-ah Kerala an hmachhawn dawn a, hnehna an chan chuan Santosh Trophy semifinal an lut ang. Group B inkhel dangah Punjab leh Maharashtra an inkhel dawn bawk.
Kerala an comeback
Nimin khan Mizoram an awl a, Punjab-in Group B hmahruaitu ni turin Kerala 2-2 in an draw. GMC, Bambolim-a inkhelah hian first half-ah goal a lut lo a, minute 49-naah Kerala defender Sherin Sam-a'n an lamah a ti goal, minute 55-naah Punjab tan U21 player Manvir Singh-a'n goal hnihna a khung leh bawk.
Punjab-in inkhel thunun mah se hun tawp lamah chak duh luatah defensive game khelin hun an khawhral a, an chetsual phah. Substitute Muhammed Parakkottil chuan minute 88-naah goal khat khungin injury time-ah si phurh sutna goal a khung leh bawk.
Group B inkhel dangah Railways-in Maharashtra midfielder Shravan Shetty own goal hmangin hnehna an chang a, amaherawhchu 2014 Santosh Trophy finalist match thum khelhah point thum chauh an hmuh avangin semifinal an luh theih a rinawm tawh lo.
Kawng hnih chu?
Mizoram leh Kerala ten point li ve ve an hmu tawh a, a chak zawkin semifinal ticket an nei dawn. Lalsangzuala Hmar hote hian hnehna an chang lo a nih chuan Kerala an pha thei tawh dawn lo a, semifinal lut turin Maharashtra lakah Punjab an chetsual a ngai dawn - Pathianni tlai inkhel a pawimawh takzet.
Mizoram coach Sanga chuan, "Punjab leh Kerala te hi first half-ah chuan an intluk tawk viau a, second half-ah erawh Kerala lam an chau hle. An forward Jobby Justin ṭha viau mah se midfielder Jishnu Bala Khrishnan leh Shahal Abdul Samad hnen aṭangin tlawpna ṭha a hmu lo. A tawpah erawh substitute Muhammed Parakkottil chu danglamna a ni a, Punjab-in an dawihzep rah an seng bawk," tiin inkhel chungchang a sawi.
Inkhel tur chungchang thlir lawkin Sanga chuan, "Punjab ang thoa Kerala hian defensive game an khel a nih chuan sawi lâwk a harsa a, amaherawhchu chak tuma min nawr ngam phawt chuan hnehna kan chan theih ka ring," tiin Vanglaini palai hnehah a inrintawk thu a sawi.
Punjab tan Pathianni tlai hi an group match hnuhnung ber a ni tawh dawn a, an khingpui tur Maharashtra tan semifinal kawng a la inhawn avangin vawi riat champion tawh Punjab hi tla thei an ni.
Services tan Mizo
Champion lai Services-in an match hmasa bera West Bengal an hneh loh hnuin Mizo tlangval Francis Zonuntluanga hmangin beiseina thar a nei. Ningani tlai khan Services hian Leitan tlangval Francis-a penalty hmangin Chandigarh 1-0 in an hneh.
Inkhel dangah inelna thlengtu Goa leh West Bengal goal awm loin an inhnehtawk. Group B-ah point sarih hmu tawh West Bengal-in semifinal an lut ngei dawn niin a lang a, hmunruak pakhat hi Services leh Goa ten an inchuh ang.
Inelna Thlirna Tawi
Group A
March 16, Ningani
Services 1 - 0 Chandigarh
SER : Francis Zonuntluanga 8' (P)
Goa 0 - 0 West Bengal
March 18, Inrinni
4:00 PM Goa Vs Chandigarh
4:00 PM Meghalaya Vs Services
Team Dinhmun
# Team Pld W D L GF GA GD Pts
1 West Bengal 3 2 1 0 2 0 2 7
2 Goa 2 1 1 0 2 1 1 4
3 Services 2 1 0 1 1 1 0 3
4 Chandigarh 3 1 0 2 2 3 -1 3
5 Meghalaya 2 0 0 2 2 4 -2 0
Group B
Nimin Inkhel Results
Kerala 2 - 2 Punjab
Maharashtra 0 - 1 Railways
March 19, Pathianni
4:00 PM Maharashtra Vs Punjab
4:00 PM Mizoram Vs Kerala
Team Dinhmun
# Team Pld W D L GF GA GD Pts
1 Punjab 3 1 2 0 4 3 1 5
2 Mizoram 2 1 1 0 3 1 2 4
3 Kerala 2 1 1 0 6 4 2 4
4 Railways 3 1 0 2 4 6 -2 3
5 Maharashtra 2 0 0 2 1 4 -3 0