Vawiin aṭangin NECS Cup quarterfinal
Aizawl district huam chhunga veng hrang hrang football hmanga inelna NECS Cup 2017 quarterfinal chu vawiin aṭangin Lammualah khelh ṭan a ni dawn a, LPS-ah live telecast a ni ang.
Quarterfinal lut team pariat chu Group A - Thingsulthliah, Ramhlun South, Ramhlun North, Armed Veng South leh Group B - Chhinga Veng, Bawngkawn, Electric Veng, Sihphir Venghlun ah ṭhendarh an ni. Vawi khat ṭheuh an inkhelh kual hnua a sang pahnihin semifinal an lut ang.
Vawiin hian vawi hnih champion tawh Ramhlun South-in sulhnu ṭha la hnutchhiah lo Thingsulthliah an hmachhawn ang. Aizawl khaw pawn team hian MPL5 U18 best forward Joel Lalmuanpuia leh Chhinga Veng defender Lalramfelpuia te an kawl avangin coach HC Zarzoliana hote tan en liam theih an ni lo.
Inkhel hmasa zawkah zawkah Armed Veng South captain C. Ramdinmawia'n MPL-a a club khelhna Ramhlun North a hmachhawn ang. AVS hian inhliam vangin Zosangliana Sailo bakah Mizoram tana Santosh Trophy khel defender R. Laldinliana leh forward Lalrammuanpuia te squad-ah an ziak lut a, chuti chung chuan player an neih ṭhat avangin champion thei zinga chhiar tel an ni.