Invenna tur kan hria - Wenger

Zanin dar 6:00 hian Arsenal chu West Brom khelmualah Pre­mier League match khel turin an lenglut dawn. Gunners manager Arsene Wenger chuan an khingpui tur team hlauhawmna lakah inven dan tur an hriat thu a sawi.

League table-a pariatna West Brom hian tun season-ah set pieces an hmangthiam hle, an goal khung zawng zawng zinga 48% zet chu set pieces aṭanga an khung a ni.

Kum 67-a upa Wenger chuan, "West Brom hian tawnhriat an nei ṭha a, an rilru a huaisen bakah an taksa pawh a fit ṭha. Hal Robson-Kanu leh Salomon Rondon te hi ven ngai khawpa thiam an ni. An team hlauhawmna ber chu set pieces a ni chiang hle a, chutihrualin keini lam pawhin invenna tur kan hria," tiin a sawi.

Season tawp ruala contract tawp ve tur Wenger chuan sawi chhunzawmin, "Inkhel harsa tak a ni dawn tih chu kan hre lawk. Mahse, kan tan insiamṭhatna hun a ni dawn a, hmahruaitu Chelsea kan hnaih theih ngei ka beisei," a ti.

Gunners hi Champions League-ah Bayern Munich lakah 10-2 in an mualpho a, an league match hnuhnung berah Liverpool 3-1 in an ngam lo bawk. FA Cup quarterfinal-a an hneh Lincoln City kha non-league club mai an nih avangin zanin hi an tan fiahna a ni dawn.