Juve hmachhawn tur Barca
Champions League inlehthalna ropui lantirtu Barcelona chuan quarterfinal-ah Juventus an hmachhawn dawn, kum 2015 final rematch kan hmu dawn tihna a ni. Paris Saint-Germain hnehtu Catalan club hian kum hnih liam ta khan nomawi chawi turin Italian champion lakah 3-1 in hnehna an lo chang tawh.
Nimin tlai khan Nyon, Switzerland-ah quarterfinal draw neih niin Premier League champion Leicester City chu final vawi thum khel tawh Atletico Madrid nen pawh fuh an ni. Kuminah a vawi khat nan Foxes hi Europe club liante inelna sang berah an inlan a, an thlen chin a piang hi history a ni zel.
Champion lai Real Madrid tan an nomawi humhim turin kawng a harsa dawn, Zinedine Zidane-a naute hmachhawn tur hi Arsenal 10-2 a sawp thei Bayern Munich an ni. Bayern manager Carlo Ancelotti-a'n Real a enkawl laiin Champions League nomawi a lo chawi tawh. Manchester City pet chhuaktu AS Monaco leh Borussia Dortmund an inkhel bawk ang.
Champions League quarterfinal first leg hi April 11 leh 12-ah khelh tur niin April 18 leh 19-ah second leg khelh tur a ni ang. Europe club-te inelna ngaihhlut ber hi Millennium Stadium, Cardiff-ah June 3 khian a hmawr bawk a ni dawn.
Quarterfinal Fixtures
Atletico Madrid vs Leicester City
Borussia Dortmund vs Monaco
Bayern Munich vs Real Madrid
Juventus vs Barcelona