Blues tan fimkhur a ngai
Premier League match khelh hmabak match 11 chiah nei chungin Chelsea chuan point 10 zetin league table-ah hma an hruai fal tawh. Antonio Conte-a'n Blues a enkawl hmasak ber ṭuma champion nghal turin kawng chanve aia thui a zawh tawh - zanin dar 8:30 hian Stoke City khelmual Bet365 Stadium-ah an lenglut ang.
Chelsea hian match 27 khelh aṭangin point 66 an hmu a, khelh zat inangah nikum aiin point 33 zetin an hmu hnem zawk tawh. Blues tan nomawi hnai tawh mah se inthlahdah a la thiang lo, Stoke khelmualah hian an lenluh hnuhnung vawi thumah ṭum hnih an chak lo. Season hmasa khan Marko Arnautovic goal hmangin Potters 1-0 in an chak.
Italian manager Conte enkawl Blues tan point 33 hmuh belh tur la awm aṭangin point24 an hmuh belh thei a nih chuan an champion dawn a, chutihrualin an elpui Arsenal, Manchester City leh Tottenham Hotspur te chu Champions League aṭanga an tlak tawh avangin league inel boruak hi a hautak sawt dawn tih a chiang.
Jose Mourinho hun laia hlamchhiah, Conte hnuaia parvul mek Victor Moses chu Manchester United an hneh ṭuma hliam tenau a tawh avangin an dinhmun a chiang lo. Tlarhnung laia defender pathum hmang ṭhin Conte-a tan Kurt Zouma chu chhawr theih a ni tawh thung.
Stoke manager Mark Hughes a fimkhur, Middlesbrough an hneh hnua Man City inhnehtawk puitu Hughes chuan, "City leh Chelsea hi an khelh dan phung a inang lo em em a, chuvangin inbuatsaihna pawh a hranin kan nei. Player paliin min nawr dawn avangin fimkhur a ngai hle ang. Kan inthlak danglam mai thei, chutihrualin kan ṭhat phahna tur ni lo chu thil dang kan ti vak lo ang," tiin a sawi.