Record-in United a hmuak

Manchester United chuan Pathianni zan dar 7:30-ah Premier League match khel turin Southampton an lenchilh dawn a, Red Devils hian hnehna an chang thei a nih chuan khualmuala league match riat chhung a zawna hnehna an chan hmasak ber ṭum an tawng ang. 

Ole Gunnar Solskjaer-a enkawl team hian away-ah result an neih ṭhat viau rualin home-ah erawh an ropui lo hle - tun season-a league match nga old Trafford-a an khelh tawhah vawi khat chiah an la chak a, hei vang hian table-ah pawh 10-na ni mekin an dinhmun a ropui lo hle. 

Chutihrual chuan United hi Champions League-a 4-1 ngawta Istanbul Basaksehir sawp hlim an ni a, an phur vanglai tak a ni dawn. Saints lakah point thum aia tlem an mitthla lo ang. 

Hetihlai hian Istanbul laka lakchhuah Aaron Wan-Bissaka leh centre-back Victor Lindelof inlan theih dawn leh dawn loh a la chiang lo a, Lindelof  dinhmun a ṭha lo lehzual - a inlan thei lo a nih chuan Axel Tuanzebe chu captain Harry Maguire nen tlarhnung laiah inkawp tura rin an ni. 

He thu buatsaih lai hian Paul Pogba dinhmun a la chiang lo bawk a, mahse Champions League-a khel ṭha em em mai  Donny van de Beek a awm avangin United tan thlaphanna tur a awmin a lang lo.