Europa League quarterfinal-ah United Paul Pogba a inhliam

Manchester United-in Old Trafford-ah Juan Mata goal hmangin FC Rostov 1-0 in an hneh a, Europa League quarter­final an lut. Jose Mourinho hote bakah hian Ajax, Anderlecht, Besiktas, Celta Vigo, Genk, Lyon leh Schalke te a sang pariatah an inhlangkai bawk.

Russia-ah English club hian Rostov hi 1-1 in an draw tawh a, Ningani zan hian knockout stage sang zawk lut turin goal chhuah loh a tawk. United hian first half-ah an hun ṭha neih an hmang ṭangkai thei lo a, FA Cup quarterfinal-a Chelsea hma­chhawn lo Zlatan Ibrahi­movic-a'n goal ban vawi hnih tih perin Henrikh Mkhitaryan-a'n keeper chauh a hmachhawn hnuah goal zawnah a pet thei lo bawk.

Second half an ṭan chauh a, inhliam vangin Paul Pogba lak­chhuah a ni. Amaherawhchu minute 70-naah Mkhitaryan-a cross chu Ibrahimovic-a'n kheng per zeuhin Mata-a'n chiang zetin a pet goal. United quarterfinal kal­kawng erawh a awlsam lo a, Rostov tana Sardar Azmoun ball tauh leh Christian Noboa-a free­kick chu Argentine keeper Ser­gio Romero-a'n a dan sak ve ve.

United an chau

Manchester United hian ni 28 chhungin match riat an nei a, match pahnih inkarah ni li pawh an chawl tling lo tihna a ni. Jose Mourinho naute an chau tih a lang a, minute 48-naah malpui hliam vangin Paul Pogba lakchhuah a ni a, inhliam vang thoin Daley Blind chu minute 64-naah thlak a ni bawk.

Second half-ah Mourinho-a'n Argentine defender Mar­cos Rojo chu balhla a pe a, Por­tuguese manager chuan kulcho tur venna atana a tih a nih thu a sawi. Khawvel player manto ber Pogba hi tun hnaiah a khelh ṭhat tawk loh avangin an sawisel nasa a, amaherawhchu midfield-ah hmun pawimawh a chan avangin Middlesbrough nen an inkhelh huna a inlan thei lo tur hi United tan channa nasa tak a ni ang.

Middlesbrough-in an mual Riverside Stadium-ah United an mikhual dawn a, Boro hian manager Aitor Karanka an ban avangin assistant head coach Steve Agnew hoin an khel dawn. United hian Europa League-ah nomawi an chawi a nih chuan season tharah Champions League an khel thei dawn a, amaherawhchu innghahna tlak a tling lo. Premier League-ah palina tal nih phak tuma an la beih ve zel a ṭul dawn a, Boro hi table-ah 19-naah awmin relegate lo tura an insiamṭhat a ṭul thung ang.

Mourinho thukhawchang

Manchester United boss Jose Mourinho chuan, "Extra time khelh kha kan hlau a ni. Elpui tam tak kan nei a, kalphung pangngai chu ni se Rostov kha kan elpui chu an ni. Amaherawhchu Thawhṭanni khan player 10-in darkar khat dawn kan khel a, Pathianni hian chhun dar 12:00-ah khelh leh a ngai dawn. Heng zawng zawng hi kan paltlang a ngai a, kan chauh vangin point hloh thei reng kan ni," tiin buaina an ngah thu a sawi.

United hian Riverside Sta­dium an tlawh hunah Ibra­himovic leh Herrera te hrem vangin an chhawr thei dawn lo a, inhliam vangin Pogba a khel thei dawn lo. Heng player pawimawh pathum bakah hian Anthony Martial leh Wayne Rooney te inkhel turin an inpeih hman ang em tih a chiang lo bawk.