England squad-ah Defoe a kir

Sunderland striker Jermain Defoe chu England squad-ah koh a ni a, kum 34-a upa striker hi November 2013-a Chile a hmachhawn hnua England tan inlan tura koh a nih lehna hmasa ber a ni. Defoe hian tun season Premier League-ah goal 14 khung tawhin hliam vanga koh loh Harry Kane (19) chiah chu English players zinga goal khung tam lama a tluk loh awmchhun a ni.

England tana vawi 55 inlan tawh Defoe bakah hian ram tana la inlan ngai lo Southampton player pahnih Nathan Redmond leh James Ward-Prowse bakah Burnley defender Michael Keane leh West Ham winger Michail Antonio te chu koh an ni bawk. Jake Livermore chu koh zingah a tel a, West Brom midfielder hian ram tan match khat khel ve tawhin kum 2012 khan Italy a hmachhawn.

Gareth Southgate-a enkawl England hian March 22-ah Ger­many nen friendly match an khel ang a, March 26-ah World Cup qualifier match khel turin Lithuania chu Wembley-ah an mikhual bawk ang. Southgate-a player koh zingah rin loh takin Luke Shaw a tel a, Manchester United left back hian December hnuah match hnih bak a la khel lo.

Southgate chuan Defoe a koh chhan sawiin, "Player naupang, chak duha tuihal koh an ṭhat rualin anmahni ang thoa chona thar hmachhawn duh reng kum upa lam kohte pawh hi a ṭha a ni. Kum naupang ringawt kan thlir reng thei lo a, a pawimawh ber chu tun huna kan result duh neih hi niin chumi rual chuan hmalam hun atan kan inbuatsaih bawk ang," a ti.

Players langsar koh loh zingah hliam damkawr captain Wayne Rooney chu koh a ni lo a, Arsenal forward Theo Walcott chu koh zingah a tel loh laiin Manchester United rawlthar duhawm Marcus Rashford chu koh a ni thung.

England squad:
Goalkeepers: Fraser Forster (Southampton), Joe Hart (Torino, on loan from Man City), Tom Heaton (Burnley).
Defenders: Ryan Bertrand (Southampton), Gary Cahill (Chelsea), Nathaniel Clyne (Liverpool), Phil Jones (Man Utd), Michael Keane (Burnley), Luke Shaw (Man Utd), Chris Smalling (Man Utd), John Stones (Man City), Kyle Walker (Tottenham).
Midfielders: Dele Alli (Tottenham), Michail Antonio (West Ham), Ross Barkley (Everton), Eric Dier (Tottenham), Adam Lallana (Liverpool), Jesse Lingard (Man Utd), Jake Livermore (West Brom), Alex Oxlade-Chamberlain (Arsenal), Nathan Redmond (Southampton), Raheem Sterling (Man City), James Ward-Prowse (Southampton).
Strikers: Jermain Defoe (Sunderland), Marcus Rashford (Man Utd), Jamie Vardy (Leicester).