Wimbledon lawmman an sem dawn tho

Covid-19 vangin Wimbledon khel thei lo mah se All England Club chuan player hnenah lawmman an sem dawn tho. Inelna nei thei lo mah se insurance an tihna aṭangin sum a awm a, ticket lei lawk zawng zawng pawh an thleng let tir bawk.

Wimbledon chief executive Richard Lewis chuan, "Tuna kan hun hmachhawn mek hi a khirh hle. Hriat lawk loh thil a lo thlen hian invenna kan lo siam lawk kha a pawimawh ta ṭhin a ni. "Player tam tak chuan sum lamah buaina an nei lo, player ṭhenkhat erawh inkhel loa an awm rei tak em avangin harsatna tawk thei an ni tih kan hria, chuvangin kan tih theih tawk tam lo mah se lawmman sem chhuah a ngai," a ti.

Indopui II-na hnua a vawi khat nan Wimbledon hi ṭhulh a ni a, grass court inelna dang pawh neih theih a ni lo. All England Club hian hri leng vanga ṭanpui ngaite puih nan pound maktaduai 1.2 an lo thawh tawh bawk.