Henderson a rawn lang, De Gea hun a zo em?

Manchester United chhan chhuak ṭhintu David de Gea a chesual ta fo a, Tottenham Hotspur nen an inkhelh ṭumin Steven Bergwijn goal khung tur a dang thei lo. Spanish keeper hian Manchester United Players' Player of the Year vawi thum ngawt a la tawh a, Sir Matt Busby Player of the Year vawi li la tawh mah se chuai lam a pan tawha ngaitu an tam hle.

De Gea dinhmun a derthawn chhan hi khelmuala a chet ṭhat tawk loh piah lamah thlak thei tura ngaih Dean Henderson a awm vang a ni a, United academy chhuak Henderson hi Sheffield United tan khelin tun season-ah vawi 11 clean sheet a nei tawh.

Manchester United manager ropui Sir Alex Ferguson chuan kum 2011 khan pound maktaduai 18.9 in Atletico Madrid aṭangin David de Gea a lalut a, hetihlai hian kum 21 mi lek ni mah se Dutch keeper Edwin van der Sar thlakna tur lakluh a nih avangin mawhphurhna pawh a nei rit nghal hle. 

Sir Alex hian tun hmain Petr Cech la thei dinhmunah a ding a, a kum a la naupan avangin a hnawl. Cech hian Chelsea zawmin Premier League keeper ropui ber zinga mi a ni a, Scottish manager hian a chetsualna ngaiah chesual nawn a duh lo. United lamin Van der Sar thlak nan hian Bayern Munich keeper ni ta Manuel Neuer an en thla bawk a, a tawpah erawh kum naupang zawk De Gea la turin thutlukna an siam.

Spanish keeper De Gea tan English football-a chet ṭhat nghal a harsa a, tharum hman nasatna league a nih avangin boruakah a ṭha nghal lo. Season hmasa berah United-in nomawi an chawi lo a, De Gea hi mawhphurtu zingah a chhal theih. Heti chung hian amah latu Sir Alex-a'n rinna a nghat tlat.

De Gea-a'n a theihna a pholang chho a, season hnihnaah Premier League-ah United a champion pui nghal. Amaherawhchu Sir Alex-a'n football manager hna a chawlhsan a, United-in tlak hniam lam an pan a, De Gea erawh United number 1 niin khawvel keeper ṭha ber zinga chhal a ni.

Kum 29 mi De Gea hi an ram Spain tana a chetsual pawhin United-ah erawh bang rinawm a ni reng. Spanish club ropui Real Madrid pawhin nasa takin De Gea hi an hel a, 2015–16 season-ah phei chuan nipui transfer-ah Los Blancos leh United hi inbe rem hman ang hiala sawi a ni a, transfer hun a tawp hman vang chauhin Spanish keeper hi an ramah a kir lo.

Real Madrid inlan hnuah De Gea hi Old Trafford-ah a rilru a nghet tawk lo tiha ngaitu an tam hle. Chutihrualin khawvel keeper ṭha ber zinga mi a nih miau avangin United manager apiangin De Gea chelh chu hna hmasaah an nei a, Ole Gunnar Solskjaer pawh a bang lo.

Spain number 1 keeper De Gea hi United number 1 keeper a ni chhunzawm zel a, Argentina number 1 Sergio Romero erawh United-ah number 2 keeper a ni chhunzawm zel. United boss Solskjaer chuan nikum September thla khan De Gea hi contract thar a ziahpui a, June 2023 thleng daih niin kum khat atan pawhsei theih a ni bawk.

Nimin tlai press conference-ah United manger chuan, "Match sariha goal hnih chhuah chu a chhiatna ka hre lo. Heng match-ah te hian Man City, Chelsea, Tottenham leh Everton te kan hmachhawn a, Toffees laka goal phei chu dan theih a ni lo. Sheffield lakah hian a dang ang nge a chhuah ang tih ka sawi lawk thei lo a, mah se min la chakpui fo. Khawvel keeper ṭha ber a ni," tiin a sawi a, Henderson tan thu hriat nuam a ni lo ang.

Manchester United-in De Gea chetsual lai pawhin a thachhangdawltu Sergio Romero an ring zo lo a, Argentine keeper hi kum 33 mi a nih tawh avangin thilmak pawh a ni hran lo. Tunah erawh Dean Henderson a rawn lang a, United thuneitute lawmna siamtu a nih rualin lu ti haitu a ni tel bawk.

Henderson hian kum 2011 khan United a zawm a, kum 2015-ah senior team-ah hlangkai ni tawh mah se United tan a la inlan lo. English keeper hi inchher hriam turin Stockport County, Grimbsy Town, Shrewsbury Town leh Sheffield United-ah te a kal a, Blades hi Premier League kaipuiin English inelna sang berah pawh keeper che ṭha ber zingah a tel pha.

Kum 23 mi Henderson hi England first keeper ni thei turin dinhmun ṭha takah a ding a, Solskjkaer pawhin England leh United number 1 a la nih theih thu a sawi nghe nghe. Amaherawhchu English keeper hian United academy goalkeeper hlui Sam Johnstone anga kum 25 nih hnua a ngheta club dang chhuahsan chauh a tum lo niin a lang.

Red Devils hian Henderson hi contract pawhsei tir tumin contract an zawrh a, Henderson hian a chet ṭhat lai hi chang chawiin first keeper nih a ngiat. United lamin De Gea an neih miau avangin thlutukna siam an la harsat rih a, amaherawhchu thutlukna siam turin hun tam an nei lo thei bawk.

Henderson-a contract chungchang hi tun nipui transfer-a mipui ngaihven tur zinga mi a ni a. English keeper hi Chelsea pawhin an iai lo niin sawi a awm a, Tottenham Hotspur manager Jose Mourinho pawhin United a enkawl lai 

aṭang a hmelhriat tawh Henderson lak a duh niin sawi a awm bawk.