Kerala laka mualpho Mizoram tan Semifinal kawng a la inhawng zel
Mizoramin Santosh Trophy-ah coach Lalsangzuala Hmar hnuaiah hneh loh an tawng ta - nimin tlai khan Kerala 1-4 in an hneh lo. Heti chung hian naktuka Railways an hneh chuan semi final an lut tho ang.
Vawi nga champion tawh Kerala hian semifinal an lut a; Group B inkhel danga Maharashtra-in Punjab 1-0 a an hneh avangin 2014 champion Mizoram tan knockout stage luhna kawng a inhawng.
Tilak Maidan Stadium-ah Kerala-in minute 10 pawh tling loah Jobby Justin leh Jishnu Bala Krishnan hmangin 2-0 in hma an hruai a, minute 26-naah Mizoram winger Lalfakzuala'n red card a hmuh avangin Mizoram an buai zual zel. Kerala tan substitute Asharudeen-a'n second half-ah goal hnih khung belhin Lalrammawia'n goal khat a thun ve bawk.
Pathum ve ve
Mizoramin Kerala hmachhawn turin player pathum an thlak. ONGC player V. Lalchhuanawma chu inhliam vangin a inlan thei lo a, a aiah Police midfielder Lalramtharmawia chu luhtir a ni. Punjab nena khel ṭha lo Lalbiakhlua aiah defender Laldinliana dah luh a ni a, Israel Laldingngheta'n right wing hna a chelh. Armed Veng South tlangval Lalrammuanpuia chu a vawi khat nan inkhel bul ṭantir a ni a, Apuia hian Police forward Lalsangbera a thlak thung.
Kerala coach VP Shaji-a'n player pathum bawk a thlak danglam.
A fuh lo!
Mizoram an khel ṭha lo a, player pawimawh Chhuantea awm loh an tuar. Goal an chhuah hma vangin an talbuai a, Fakzuala'n red card a hmu bawk.
Mizoram manager Lalthanzama Vanchhawng chuan, "Red Card hmuh dan hriatthiam har khawp mai. Yellow card hmuh lohna turah card min pe a, hemi hnu hian a lak tlang vek hnuah an titlu a, foul a ham lo. Fakzuala lungawi loin a sawisel a, yellow card vawi hnihna a pe. Kan khel ṭha lo a, referee thutlukna hi inkhel tidanglamtu a ni," tiin referee chunga a lungawi loh thu Vanglaini palai a hrilh.
Mizoram hian second half-ah si phurh sut tumin Biaktea an dah lut a, Mizoram vice captain hian game thlak danglam mah se vanneihna a keng tel lo.
Police forward Biaktea hian chance ṭha a hlah a, Punjab an hmachhawn ṭuma a vanduai ang thoin Kerala lakah a vanduai. Mizoram-in an si phurh sut an tum luatah an tawngpawng nawr tawh a, hei hi tuarin Asharudeen-a'n goal hnih dang a khung belh a, point hlawhchhuah tum Sanga hote tan thawhchhuah ngaihna a awm tawh lo.
Minute li chiah a awm tihin substitute Lalrammawia'n Mizoram tan a goal khat a khung a, North East-a football thiam ber state tan mualpho hliah khuhna a ni pha ta chuang lo.
Beiseina thar
Kerala-in hnehna an chang rualin semifinal an lut tih an hria a, GMC Bambolin-a inkhel result-in Mizoram beiseina a siam ve bawk. Punjab-in Maharashtra an hneh loh avangin beisei tur an nei tawh lo a, amaherawhchu he result avang hian Maharashtra bakah Mizoram leh Railways-in besei tur an neih phah.
Sanga hote hian an match hnuhnung bera Railways an hneh chuan semifinal an lut ang.
Mizoram manager Zama chuan, "Kan vannei tak zet a ni. Maharashtra-in beiseina min siam a, tunah chuan Railways hneh turin theihtawp kan chhuah ang. Kan tan chuan kan match hnuhnung ber hi final ang a ni a, kan ṭhat dan berin kan inlan tawh ang," tiin semifinal thlen a la inbeisei thu a sawi.
Punjab hi chak se Mizoram hi tla tur an ni, Punjab an chak loh chiah hian Mizoram dinhmun a ṭha a; naktuka Railways nen an inkhel tur hi 'quarter final' ang deuh a ni a, a chak zawkin semin final an lut ang.
Semifinal-ah West Bengal
Inrinni khan Goa leh Chandigarh te 1-1 in an inhnehtawk a, Group B inkhel dangah Meghalaya-in champion lai Services 2-0 a an hneh bawk avangin point sarih hmu tawh West Bengal-in semifinal an lut.
West Bengal hian kum 2011 khan Manipur hnehin Santosh Trophy-ah a vawi 31 nan an champion a, amaherawhchu record nei ṭha ber state hian inelna hnuhnung pangaah semifinal an lut tawh lo. Tun ṭum hi kum 2011 hnua a sang pali zinga an telna hmasa ber a ni.
Group B-ah Chandigarh-in point sual chhuak mah se an tla tawh. Goa, Services leh Meghalaya ten beisei tur an la nei vek. Inelna thlengtu Goa tan semifinal lut turin Services lakah point hmuh a tawk a, champion lai Services tan erawh Goa lakah point thum an hmu a nih pawhin tla thei an la ni.
Services-in hnehna an chan a, Meghalaya-in West Bengal an hneh erawh chuan NorthEast club hi semifinal lut tur zawk an ni. Chutihrualin semifinal lut tawh West Bengal-in point an hmuh a, Services-in point thum an hlawh chhuah bawk chuan champion lai hian knockout stage an lut ang.
INELNA THLIRNA TAWI
GROUP A
March 18, Inrinni
Goa 1 - 1 Chandigarh
GOA : Aaren D'Silva 13'
CHA : Sehjpal Singh
Meghalaya 2 - 0 Services
MEG : Dibinroy Nongspung 8'; Bisharlang Kharumnuid 77'
Vawiin Inkhel Tur
4:00 PM West Bengal Vs Meghalaya
4:00 PM Services Vs Goa
Team Dinhmun
# Team Pld W D L GF GA GD Pts
1 West Bengal 3 2 1 0 2 0 2 7
2 Goa 3 1 2 0 3 2 1 5
3 Chandigarh 4 1 1 2 3 4 -1 4
4 Services 3 1 0 2 3 1 2 3
5 Meghalaya 3 1 0 2 4 4 0 3
INELNA THLIRNA TAWI
GROUP B
Nimin Inkhel Results
Maharashtra 1 - 0 Punjab
Mizoram 1 - 4 Kerala
MIZ : Lalrammawia 86'
KER : Jobby Justin 7'; Jishnu Bala Krishnan 9'; Asharudeen 65', 84'
March 21, Thawhlehni
4:00 PM Railways Vs Mizoram
4:00 PM Maharashtra Vs Kerala
Team Dinhmun
# Team Pld W D L GF GA GD Pts
1 Kerala 3 2 1 0 10 5 5 7
2 Punjab 4 1 2 1 4 4 0 5
3 Mizoram 3 1 1 1 4 5 -1 4
4 Railways 3 1 0 2 4 6 -2 3
5 Maharashtra 3 1 0 2 2 4 -2 3