Vawiinah MCL final ; Chanmarians hmaa ding tur Chhinga Veng

Mizorama cricket inelna ngaihhlut ber Mapuia Cricket League final chu vawiin chawhma dar 11:00 hian khelh a ni dawn a, Suaka Memorial Cricket Ground, Sihhmuia inkhel turah hian nikum final rematch kan hmu dawn - Chanmarians CC leh Chhinga Veng CC an inhmachhawn ang. 3C hian Inrinni khan Qualifier 2-ah final lut turin Kulikawn chu run 16-in an hneh.

MCL5-ah team pahnih hi vawi hnih an inhmachhawn tawh a, Chanmarians an chung­nung ve ve. 3C-in a zawna vawi thum Chanmari ngam lo nih an duh dawn lo a, an record duhawm lo thaichhiat an duh ang - Chanmarians-in a zawna MCL nomawi chawi theihna hun ṭha an neih hi bawhpelh an duh dawn bik lo.

Chanmarians-in an match hmasa bera run khata Chhinga Veng an hneh hnuah rin loh takin Armed Veng ngam lo mah se an insiamṭha nghal a, Zarkawt Lords leh Kuli­kawn lakah hnehna chan chhunzawmin qualifier 1 an inhlangkai. Qualifier 1-ah pawh Chanmarians-in an khelh ṭhat an chhunzawm zel a, match hmasa bera an hneh hnu Chhinga Veng hneh lehin final an lut.

Chhinga Vengin match hmasa berah chak loin bul ṭan mah se an tlu nawn tawh lo - Zarkawt Lords, Kulikawn leh Armed Veng hneh vekin qualifier 1 an lut a, an ngam loh erawh Chanmarians bawk a ni. Mahse, 3C-in qualifier 2-ah hun ṭha an neih chhunzawm a, Kulikawn lakah an chance neih an bawhpelh lo - final an lut.

Innghahna

Chanmarians tan batsman Lalhruaizela chet ṭhat a pawi­mawh dawn. Durtlang tlang­val hian match nga a inlanah run 126 a vaw chhuak tawh a, Chhinga Veng nena an league match hmasa berah run 29 vaw chhuakin qualifier 1-a an intawn ṭumin run 50 a vaw chhuak leh bawk - Chhinga Veng bowler-te a ngam ṭhin hle. 3C tan Chan­marians batting line-up ṭha chelh ding turin off spinner Lalruatdika chet ṭhat a ṭul dawn.

Chhinga Veng batsman zingah che ṭha fal tia sawi tur an awm lo. Match ruk a inlana run 128 vaw chhuaktu opener Abhay Joshi chet ṭhat a ṭul dawn a, a opening partner Saiddul Faruq-a'n a thlawp ṭhat a ṭul bawk ang. MCL inelnaah off spinner an che ṭhat ṭhin avangin F. Lalmuanzuala chu bowling lama Chhinga Veng innghahna tur a ni.