Mizo pathum telna India team

India coach Stephen Constantine chuan AFC Asian Cup Qualifier khel tur India squad a tichiang a, players 31 koh aṭanga players pasarih chhawkin players 24 zingah Mizo pathum Jeje Lalpekhlua, Daniel Lalhlimpuia leh Jerry Lalrin­zuala te an tel. India hian Inrinni zan khan friendly match an khelh hmasakna hmun tur Cambodia panin Mumbai khawpui an chhuahsan.

English coach Constantine hian players 31 a koh hmasak zingah Isaac Vanmalsawma a tel a, mah se Hnahthial rawlthar hi dan phal loh anga India camp-a a awmlai thlalak a club khelhna Shillong Lajong lamin an lo pholan avangin Constantine hian squad aṭang hian a paih leh ta zawk a ni. Hetihlai hian Mizo rawlthar Jerry Lalrinzuala tan erawh India squad-a a awmna hma­sa ber a ni a, ani bakah hian pla­yers 24 zingah Nishu Kumar, Anas Edathodika leh Milan Singh-te chu India tana la inlan ngai lo an ni bawk.

India hian March 28, 2017-ah Myanmar chu AFC Asian Cup Quali­fiers UAE 2019-ah an hmachhawn ang a, ṭhenawm ram hmachhawn tura inpuahchah nan hian March 22-ah Cambodia nen friendly match an khel phawt ang. India coach Con­stantine chuan, "Mumbai khawpuia inbuatsaihna kan neih chhungin kan naute an thawkrim em em a, kan hma­a chona inchhawp hmachhawn tur­in kan inpeih tawh a ni," tiin a sawi.

India Squad
GOALKEEPERS: Subrata Paul, Gurpreet Singh Sandhu, TP Rehenesh
DEFENDERS: Pritam Kotal, Nishu Kumar, Sandesh Jhingan, Arnab Mondal, Anas Edathodika, Dhanapal Ganesh, Fulganco Cardozo, Narayan Das, Jerry Lalrinzuala
MIDFIELDERS: Jackichand Singh, Udanta Singh, Eugeneson Lyngdoh, Milan Singh, Md. Rafique, Rowllin Borges, Halicharan Narzary, CK Vineeth
FORWARDS: Jeje Lalpekhlua, Sunil Chhetri, Daniel Lalhlimpuia, Robin Singh