Chelsea an champion dawn?

Britannia Stadium-ah Chelsea ṭantuten, "Tunah chuan min awih tawh ang, kan champion dawn," tiin Stoke City an hneh zawhah nuam ti takin an zai rual a, Premier League thlir ṭhin tan rinhlelh tur a awm tawh lo.

Inrinnni zan inkhelah Blues tana Willian-a freekick khung chu Stoke City-in Jonathan Walters penalty hmangin sut mah se Chelsea tana penalty chawitu captain Gary Cahill-a'n minute thum chiah a awm tawh tihin chakna goal a khung. London club hian vawi 28 an khelh tawh aṭangin point 69 an hmu a, anmahni aia anmahni umtuten point hloh an chin zawk bawk avangin match 10 khelh tur la awm mah se Premier League nomawi an chawi ngei a rinawm hle.

Champion zia?

Minute 13-naah Brazilian mid­fielder Willian-a'n mual vei lam aṭangin freekick a pet a, Stoke kee­per Lee Grant-a'n mak takin a dang lo. Blues vanneih a kaltluang a, champion kawng an zawh tih a chiang.

Mahni mual hmang thiam Stoke-in an nawr let a, Bruno Martins Indi chuan minute 34-naah a tauh goal a, pawm sak erawh an ni lo. Assistant referee-in Adam Nunn-a'n box chhungah Stoke forward Saido Berahino-a'n defender Cesar Azpilicueta a nam thlu lai a hmu chiang a, hmuh hmaih theih leh en kan theih a nih lawi si avangin Chelsea an vannei nawn.

Minute 41-naah erawh Chelsea an vanduai a, Cahill-a'n goal theih­na kawng pawh awm loa ngaihah Walters a nam thlu a, penalty a chawi. Stoke midfielder Walters hian a pet goal chiang hle. Britannia Stadium-a point thum hlawhchhuah a awlsam lo a, champion tum Chelsea erawhin an tum ram thleng turin kawng harsa paltlang a ṭul tih an hria.

Second half-ah Blues goal nawr a na a, keeper Grant che ṭha mah se dan sen a ni lo. David Luiz-a ball tauh chu Erik Pieters-a'n Cahill-a zawnah chauh a pet sawn thei a, Chelsea captain chiang zetin a pet goal. Italian manager Conte hote an huaisen a, captain Cahill-a'n khelmual chhungah mawhphurhna a la ngam.

Chelsea chakna kawngah Diego Costa-a'n tha a thawh hlawk a, Spain international forward hi inkhel boruak ti ṭangtu a ni bawk. Injury time-ah Phil Bardsley-a'n Blues midfielder Cesc Fabregas a tlawh avangin hnawhchhuah a ni a, result tidanglamtu ni lo mah se inkhel boruak sawifiahtu a ni.

Blues hian inelna hrang hrang an hmachhawn hnuhnung 23-ah vawi 20 hnehna an chang a, Premier League an champion ngei hmel tawh a, FA Cup champion tura rinkai an ni bawk. April 1 hian Stamford Bridge-ah Conte hote hian Crystal Palace an mikhual ang.

Conte a lawm

Chelsea boss Antonio Conte chuan, "Stoke khelmuala point thum hlawh chhuak tur hian taksa leh rilru inpeih a ngai a, kan inpeih miau avangin team ṭha tak lakah kan chak a ni," tiin inkhel chungchang a sawi.

Champion chungchang sawiin Conte chuan, "Match 10 khelh turah point 21 kan mamawh a, kan dinhmun a ṭha hle. Amaherawhchu chak duhna thinlung kan neih reng a ngai a, team anga kan thawhhona a ṭhat a ngai a, nomawi hi kan sual chhuah a ngai," tiin tha thlah thei an la nih loh thu a sawi.