Chelsea aia ṭha zawk Sheffield

Inrinni zan khan Sheffield United-in Champions League khelh tum Chelsea chu 3-0 in an sawp a, inkhelh banah Blues boss Frank Lampard chuan, "Tharum, rilru put hmang leh ball nen pawh an ṭha zawk," tiin an khelh danah a lungawi loh thu a sawi a, Blades an khel ṭha zawk tih a pawm.

London club hian match pawimawhah point an hlawhchhuah loh avangin season thara Champions League khel lo thei dinhmunah an ding. A êng zawnga thlir erawh chuan an elpui Leicester City leh Manchester United te an la inhmachhawn dawn avangin an khingpui an hneh vek chuan Europe-a inelna sang ber an khel thei ang.

Bramall Lane-ah mualneituin David McGoldrick hmangin minute 18-naah goal hmahruai an khung. Blues keeper Kepa Arrizabalaga-a'n Blades forward Oli McBurnie volley dang thei mah se a per nang fuhtu McGoldrick dan rual a 

ni ta lo.

N'Golo Kanté tel lohna Chelsea tlarhnung hi Cyrstal Palace an tum ṭum ang thoin a phui lo a, goal khung theih vang a ni lo  - goal venhim thiam vanga che ṭha Blades tlarhma lakah pawh Blues tlarhnung hi a nghing nasa hle.

Minute 33-naah vei lam aṭanga Enda Stevens cross chu McBurnie-a'n a tauh lut a, keeper Kepa-a'n a en lut. Second half-ah inkhel a danglam lo, Chelsea tlarhnung a pawp chhunzawm. McGoldrick-a'n minute 77-naah Sheffield goal

thumna a khung a,  substitute Antonio Rudiger-a petchhuah sual vang a ni.

Point thum mamawh Chelsea-in goal thum an chhuah a, point an hlawhchhuah loh bakah goal an khung lo. Lampard-a naute khelh danah Blues ṭantute tan lawmna tur a vang hle.

Chelsea ṭantute lawmna chu season thar atan Timo Werner leh Hakim Ziyech an lalut hi a ni a, Kai Havertz hming a ri ring viau bawk. Amaherawhchu tun dinhmuna Chelsea buaina chu tlarhnung a ni a, tun season league-a goal 50 chhuah tling turin goal khat chiah an mamawh tawh a, inchhuanna tur a ni lo. 

Premier League kai thar Blades-in Blues tlarhnung awlsam takin an ṭhiat a, Kurt Zouma leh Andreas Christensen te inkawp an la patuai. Chutihrualin tawnhriat nei ṭha ber Rudiger lah bench aṭanga a rawn lutin a tihsual a langsar ber.

Transfer bazar-ah thawm an nei ring a, amaherawhchu an player kawl mekte ah duh khawp lohna a tam hle. Lampard-a'n Jorginho a ring tawk lo a, Italian midfielder hi Blades nen inkhel bul ṭan mah se Maurizio Sarri hnuaia a khelh dan  nen a inthlau ta hle. Chelsea chhul chhuak Tammy Abraham leh Mason Mount te pawhin uaptu an mamawh a, season thara Champions League khel turin Lampard-a hoten insiamṭhat ran an mamawh hle.

Chelsea hian tla tawh Norwich City, Liverpool leh Wolverhampton Wanderers te an la hmachhawn dawn a, fixtures hautak viau mah se an chak vek erawh chuan Champions League an khel dawn. London club-in chak lohna lai nei bawk mah se an khelh fuh ṭumah erawh eng team pawh hneh thei an ni.

Sheffield United-in point thum hlu tak an sualchhuah avangin Europa League khel turin an dinhmun a ṭha chho leh a, Blades hian Chelsea an hneh hma hian Tottenham leh Wolves te an hneh tih hriat a ṭha.  Chris Wilder chuan, "Ball tel leh tel loin ka naute an khel ṭha a, Europe inelnaa tel kan duh a nih chuan thil dang ngaihtuah a thiang lo. McGoldrick-a'n goal a khung ta a, kan lawmpui takzet," tiin inkhelh banah a sawi.

Kum 32 mi McGoldrick hian season liam ta khan goal 15 a khung a, 2019-a Sheffield United player of the year a ni. Premier League-ah erawh English striker hian goal khung a harsat a, chutichung chuan manager Wilder hian a thawhrimna avangin a fak ṭhin hle. Chelsea lakah McGoldrick-a'n a thawhrim rah a seng a, Premier League-a a goal hmasa ber a khung.

Chelsea manager Frank Lampard chuan, "Kan khelh dan hian ngaihtuah a ti thui hle. Thil tam tak ka zirchhuah phah a, tunah chuan palina china awm turin thi leh thau pawlha kan ṭan a ṭul a ni," tiin a sawi.