Napoli-in Maradona an thlah

Napoli chuan Ningani zan khan Europa League-ah HNK Rijeka an hmachhawn a, 2-0 in an hneh. Italian club hian ropui takin Diego Maradona an thlah a, an legend thihna an tuar tih hi khawvelin a hriatpui.

Stadio San Paolo pawnah chuan Napoli ṭantute an pungkhawm a, a chhehvel zawng zawng chu an ti êng vek. Napoli neitu Aurelio de Laurentiis chuan stadium chu Maradona hminga thlak a duh thu ziakin a dah tawh a, Naples mayor Luigi de Magistris pawhin a thlawp.

De Laurentiis chuan, "I chanchin aṭang hian thu ropui tak min hnutchhiah a; mihring hi chakna leh chak lohna nei kan ni a, nunna hlutzia leh ṭhenawmte hmangaih ṭulzia kan hriat phah a ni. I chak lohna, famkim lohna leh tihsual zawng zawng hian i ropuina hi a hliah khuh pha lo," tiin Maradona chu famkim lo mah se an hmangaih leh ngaihsan dan a ngai reng thu a sawi.

Inkhelh ṭan hmain Napoli leh HNK Rijeka ten minute khat chhung Maradona sunna hun an hmang a, Italian club player-te jersey hnungah Maradona leh no. 10 a chuang vek bawk. Italian club hian Matteo Politano leh Hirving Lozano te goal hmangin Rijeka 2-0 in an hneh.

Napoli neitu Aurelio de Laurentiis chuan, "San Paolo hi i hming chawia dah hi ṭha ka ti a, chuti chuan kawng dik kan zawh lai hi chung lam aṭangin min thlir reng thei ang. Diego kan lawm e. Kan zinga mi i ni a, kan bulah i cheng kumkhua bawk ang," tiin club legend a thlah.

Naples hi Covid-19 hluarna hmun ni mah se Stadio San Paolo pawnah hian Napoli ṭantu 300 aṭanga 400 bawr vel an pung khawm a; banner leh flag an keng a, Maradona thihna vangin an ngui hle.

Football legend Maradona vangin Italy-a khaw rethei zinga mi Naples hi hmar lama khaw hausa ho club-te chungah an awm theih phah a, Diego thihna vanga mittui luang hi a la hul lawk dawn lo.