UCL khelh loh pawhin kan buai lo ang - United boss

Chelsea-in Sheffield United lakah point an hloh avangin Manchester United tan Champions League kawng a inhawng zau sawt. Ole Gunnar Solskjaer hote hian zanin dar 12:30 hian Old Trafford-ah Southampton an mikhual dawn. 

United boss Solskjaer chuan, "Champions League kan khel ta lo a nih pawhin kan ruahmanna siam sa thlak tur khawpin kan talbuai lo ang. UCL kan khelh phak erawh chuan thulukna siam erawh a awlsam phah dawn," tiin a ṭawng fimkhur hle. 

Manchester United hian Champions League an khel phak lo a nih chuan an kawr sponsor-tu Adidas nen an inremna angin pound maktaduai 22.5 chawi theih dan a awm a, hei bakah hian nipui transfer-ah player lak a har sawt bawk ang. Heti chung hian Solskjaer-a'n an chunga pressure nasa tak awm mek chu vuak kian a tum.

United hi Borussia Dortmund winger Jadon Sancho nen sawi zawm an ni a, chutihrualin chhut tel tur a la tam hle. Solskjaer chuan, "Thil chiang lo hi a la tam hle. Europa League-a kan thlen thui dan a zirin season thara kan inpuahchah dan tur leh kan player mamawh tur a nghawng dawn. Ruahmanna chu a awm a, amaherawhchu thil chiang lo a tam avangin thutlukna siam theih a la ni lo," tiin a sawi a, Premier League ṭan hun hi la hriat chiah lo mah se September 12 vela ṭan theih beisei a ni.

Southampton an mikhual hunah inhliam sa Phil Jones leh Axel Tuanzebe te tih loh chu Solskjaer-a'n a chhawr thei vek dawn a; Mason Greenwood, Bruno Fernandes, Paul Pogba, Anthony Martial leh Marcus Rashford te chu inkhel en ti châkawmtu tur an ni. Chutihrualin Saints-in match thum chhung chak loh an nei tawh lo a, Manchester City pawh 1-0 in an hneh. Southampton hian tun season Premier League-a goal 19 khung tawhtu Danny Ings an kawl bawk avangin United tan chetsual theih a ni.