Mizoram Lockdown (inkharkhip) Ni 113

Football ngaina zingah Barcelona midfielder ropui ṭhin Xavi hming hre lo kan awm kher lo ang. Qatari club Al Sadd-a coach hna thawk mek hian a career chhung zawngin Barca B, Barca leh Al Sadd tan a khel a, inelna hrang hrangah match 945 khelin goal 113-a khung. Xavi hian Barca B team tan season thumah match 61-a khelhsak a, kum 1998-99 khan senior team-a a season hmasa ber a hmang a, kum 2000 thleng khan reserve team tan inlan a la nei ṭhin thung. 

Barca tana a season tawp ber chu 2014-15 season khan a hmang a, kum 2015-ah sum tamna Qatar lamah kalin 2018-19 thleng a khel - inkhelh a chawlhsan hnuah Al Sadd coach hna a thawk zui. Xavi hian player a nih laiin Catalan club tan La Liga (8), Copa del Rey (3), Spanish Super Cup (6), Champions League (4), UEFA Super Cup (2) leh FIFA Club World Cup (2) nomawi a chawi hman a ni. Spain tan World Cup 2010 leh Euro 2008 & 2012 nomawi a chawi a, inelna hrang hrangah match 133 khelhsakin goal 13 a khung. FIFA FIFPro World XI-ah vawi ruk a lang a, UEFA Team of the Year-ah vawi nga a lang bawk.