Lei chunga Roreltu Rafa

Hming dang an leng lo. Aw, an leng mawlh lo - Rafael Nadal chauh lo chu! Spanish star hian a vawi 14 nan French Open nomawi a chawi leh ta, tennis inelna lian bik Grand Slam title pawh 22 teh meuh a kawl khawm tling ta bawk.

Pathianni zan Roland Garros final-ah Nadal hian Casper Ruud chu 6-3, 6-3, 6-0 in a sawp. Tennis khelhna chi hrang hrang zinga pakhat clay (lei) hi Nadal tan chuan hmun ṭha bik a ni a, van hnuaiah hian amah elphak reng reng an la piang lo.

Grand Slam champion hnem lamah Nadal a kal fal zel a, amah hnaihtu player ropui pahnih Roger Federer leh Novak Djokovic te aiin nomawi pahnihin a ngah ta zawk, a vuak chhuah belh leh a nih pawhin a mak lo ang.

A hnehsawh
French Open khel tur an pawh (draw) khan, a ranking a hniam avangin Nadal awmna lamah ranking san an awm tam a ngai. Quarterfinal-ah Djokovic a hmachhawn a ngai a, season hmasa semifinal-a a ngam loh hi harsa vak loin a hneh.

Alexander Zverev nen semifinal hmuhnawm an khel a, hma a hruai laiin a khingpui hi a inhliam. Quarterfinal leh semifinal-a a player paltlang ngaihtuah chuan final hi thil huphurhawm a ni hran lo, chak turin darkar hnih leh minute 18 chiah a mamawh hial.

Court Philippe-Chatrier-ah a tir aṭangin Nadal hi kawng engkimah a chungnung, a service vawi hnih chu hloh ve bawk mah se, a duh hun hunah Ruud-a service hi a chhuhsak thei emawni tih mai tur a ni a, hniam zawk nih lai nei loin a chak tlang.

Point hnuhnung ber a hmuh hnuah Nadal-a'n a racquet chu leiah a thlauh a, tun hma pawhin hetiang hi lo tawng fo tawh mah se a hlut dan a la danglam chuang lo. A tan chuan Roland Garros hi engkima engkim a ni.

A la tar lo
Kum 36 piancham a thlen aṭanga ni hnih hnuah French Open a khel a, inkhel hautak zawk hmachhawn tur pawhin thahruai a la nei ṭha hle. Kum 23 mi Ruud aiin a tlan tamin a la taima zawk a, point khat lek hmu tur pawhin a la thawkrim hle.

Ringhleltute chuan tharum a hman nasat avangin, 'A daih rei lo ang, a upat deuh hunah a chuai hma dawn' tih chu Nadal chungchang an sawina a ni ṭhin. Hun a inher zel a, a kum rualpui tam tak an chawl tawh a, ani erawh tleirawl thaza rual ho aiin a la harhvang ṭha.

Pete Sampras hnung zuiin, 2005 daih tawh khan mipa player kum 20 hnuai lam Grand Slam champion thei record a lo siam tawh, kha tih lai kham kum 19 mi chauh a la ni. A hlawhtlin hmasak ber aṭanga kum 17 a liam hnuah pawh a la ṭha rang.

Amah ang bawka Spanish player ve tho Andres Gimeno chuan 1972 khan kum 34 mi niin French Open nomawi hi a lo chawi tawh a, hun rei tak chhung record a lo chelh tawh hi kum 36 mi Nadal-a'n a rawn khum ta chiah.

A ropui
Tennis khelhna hmun hi a inang lo - grass, clay leh hard court-ah khelh ṭhin a ni. A hmun a inan loh ang bawkin player hrang hrang khelh thiamna hmun a inang lo. Nadal tan chuan clay aia hmun ṭha leh duhthusam a awm thei lo.

Clay-ah hian ball kal a muang hret a, ball a sawt sang thung. Hma zawnga ball vaw vir thiam, tharum ngah leh forehand nei na tak Nadal tan chuan vanram tlafual a ni ringawt mai, baseline aṭangin a duh tawkin a hlap thei ṭhin a ni.

Leiah chauh a ni bik lo, hard court-ah pawh Grand Slam nomawi vawi ruk a chawi thei! A inkhelh thiam lohna tia an sawi grass-ah ngei pawh Wimbledon title vawi hnih a la tho, a thiam lohna berah pawh a thiam tho tihna a ni ber awm e.

Andy Murray-a'n 'Sir' nihna hlawh chhuak turin Wimbledon title vawi hnih a la. British mipuiin hahipa an fak Murray-a inkhelh thiam berna hmuna a record leh Nadal inkhelh thiam loh berna a intluk tawk vel viau tia sawi theih a ni.

Ruud tan a sang
Casper Ruud ten Grand Slam final hmasa ber a ni a, chutah a naupan lai aṭanga a ngaihsan Nadal ber kher a hmachhawn. Norway tlangval hi Nadal-a tennis academy aṭanga inzir chhuak a ni, a nihna takah chuan an inkar a la zau rih veng veng hle.

Final kalkawngah hian player langsar a hmachhawn meuh lo. A hmachhawn theih zinga mi Daniil Medvedev leh Stefanos Tsitsipas te an tla hma, chutih rualin semifinal-ah Marin Cilic a hneh thei a, a ṭha ve tawk tih chu a fiah.

Seeded pariatna Ruud chuan, "Rafa hian Court Philippe-Chatrier-ah mi tam tak a lo sawisa tawh ṭhin, sawisak tuartu zinga pakhat ka ni ve mai. A sulhnu leh hlawhtlinna hmuh hian sawi belh tur vak a awm lo, hei hian a sawifiah nghal.

"Engtik niah emawni chuan ka tu leh fate hnenah Nadal nen French Open final kan khel tih hi inchhuang takin ka la hrilh ve ang," tiin Nadal a hmachhawn thei chu a lawm a, atan dan ngaihna a awm lo tih pawh lungawi takin a pawm.

"A chhanna dang a awm lo ve, ka tan chuan French Open hi khawvela tournament ṭha ber a ni. Ka tan chuan engkima engkim a ni a, hmalam hunah eng nge lo thleng dawn tih hre lo mah ila Roland-Garros atan theihtawp ka chuah chhunzawm ang. "Roger Federer leh Novak Djokovic te nena kan inkar sawi a awm ṭhin, kei pawhin ka sawi fo tawh ang khan kan pathum hian kan suangtuah phak ngai loh ramah kan cheng mek a ni. Record ni loin inelna hian chona min siam ṭhin," - Rafael Nadal