MSL7-ah hmahruaitu Mission Veng vs champion lai Zarkawt

Mizoram Super League Season 7-ah Mission Veng Hotshots-in an match hmasa pahnihah hnehna an chang a, zanin dar 8:00 hian R. Dengṭhuama Hall-ah champion lai Zarkawt BCA an hmachhawn ang.

BCA hian an match hmasa berah MSL6 fi nal-a an hneh Khatla TBL chu 96-79 in an hneh a, Hotshots lakah pawh buk rit zawk an ni.

Zarkawt hian Matthew Remtluanga Sailo bakah an veng tlangval pahnih Lalsangpuia Ralte leh Lalhnehpuia Chhakchhuak te an neih belh a, ṭum dang zawng aiin tun season-ah veng mipui ṭawiawmna an neih ṭhat a rinawm.

Coach Lalruatfela (Afela) hote hian TBL lakah hnehna chang mah se an theihna tak tak an la pho chhuak lo a, Hotshots lakah inkhel hmuhnawm an chhawpchhuah a beiseiawm.

Mizo baller zinga khel mawi ber zinga mi Lalrina Renthlei leh game fing Zonunsanga te an kawl a, an pahnih ringawt pawh hi hmuhnawm tham an ni. Champion lai hian foreigner Joseph Frederick Allen bakah state pawn player Sowkin Shetty leh Aaron Varghese Blessen te an ziaklut a, an pathum zinga sang ber American mi Allen a awm tawh.

TBL lakah Allen hian point 33 nei mah se mipui tih phurna tura 'dunk' a tum chu a ti fuh lo - Hotshots lakah a dunk fuh tawh ngei ang.

Zarkawt rawlthar Hnehpuia hi United States-ah college basketball khel mek a ni a, mipui mit fukna a ni leh dawn. Mission Veng Hotshots-in an match hnuhnung berah champion tum Tuikual South chu 80-69 in an hneh thei a, inrintawkna nasa tak an neih phah ang.

Hotshots-in LeBron James te khua Ohio, Cleveland aṭanga an chah Joshua Aaron Keys a rawn thleng tawh. Aaron Keys hian TKS an hneh ṭumin 21 points an nei nghal a, hahdamna hun ṭha a neih tawh avangin BCA lakah ṭha lehzualin a khel thei ang.

Chutihrualin Hotshots hi Aaron Keys chungah ringawt an innghat lo a, Mizo player Eddie Zairemmawia leh Lalrozama ten hmun pawimawh an chang pha. Khatla tlangval Eddie hian theihna sang tak a nei a, engvangin Khatla TBL-in an chhuah tih hi basketball ngainatute zawhna a ni.