Ronaldo a tar thei lo

Nations League an match hmasa bera Spain nen an inhnehtawk hnuin Portugal an tho leh ta a, thawhlehna hmahruaitu chu Cristiano Ronaldo a ni - kum 37 mi val hian Switzerland lakah goal hnih a khung.

Portugal hian an mikhual Switzerland hi 4-0 in an hneh a, Ronaldo bakah hian William Carvalho leh Joao Cancelo te chuan goal khat ve ve an khung a, Portugal an chak chiang.

Hetihlai hian Spain-in Czech Republic laka point hlawh chhuak turin vanneihna an mamawh a, hun pek belha Inigo Martinez goal hmangin Czech hi 2-2 in an inhnehtawkpui hram.

Czech hian Jakub Pesek leh Jan Kuchta hmangin vawi hnih ngawt hma an hruai a, mahse, Spain hian Gavi leh Martinez hmangin si phurh hi an sut ve ve a ni.

A hming Ronaldo
Kum 37 meuh a nih hnuah pawh Ronaldo-a'n a thiam a la theihnghilh thei lo - minute 15-naah Carvalho chuan goal hmahruai a khung a, Ronaldo free kick pet Switzerland keeper Gregor Kobel-a dan per chu Real Betis midfielder Carvalho chuan goal-ah a chantir.

Minute 35-na a ni a, a khungtu lamah Ronaldo a ṭang zui - Portuguese forward hian Diogo Jota siamsak chu goal-ah a chantir a, minute li hnuah a goal hnihna a khung zui.

Ronaldo goal hnihnaah pawh Jota a inrawlh a, Liverpool forward 'shot' per aṭanga ball kal chu Ronaldo hian rang takin goal-ah a chantir - Manchester United forward Ronaldo hian ram tan match 188-a goal 117 a khungna chiah a ni.

Minute 68-naah Swiss keeper Gregor Kobel chetsual zar zoin Cancelo chuan a khung ve leh bawk a, Portugal mualah dawl zawrin Switzerland an zawr a, 4-0 in an tlawm.

Spain an vannei
Portugal nena inhnehtawk hlim Spain-in chak inring tak chungin Czech Republic an lenchilh a, mahse, point khat pawh harsa takin an hawn hram - inchhuang thei an awm lo.

Czech tan minute lina lekah Sparta Prague winger Pešek chuan goal hmahruai a khung a, mahse, Barcelona midfielder ṭhangduang Gavi chuan first half hun pek belh minute thumnaah a sut - kum 17 mi tan ram tana a goal hmasa ber a ni.

Mahse, mualneitu Czech hian second half-ah pawh goal an khung hmasa zawk. Switzerland laka 2-1 a an chak ṭuma goal khungtu Kuchta chuan Nations League match hniha a goal hnihna a khung a, goal khung tura Spain keeper Unai Simon a pet khum chu goal 'class' a tling.

Spain-in tlawm mai erawh an tum bik lo - minute 90-naah Marco Asensio siamsak chu Inigo Martinez chuan a khung a, 2-2 a ni. Goal dang lut turin hun a tlem tawh a, team pahnihin point khata lungawi an zir.

Fak tlak Haaland
Manchester City fan-ten an hmuh duh tak an hmu leh ta - an striker thar Erling Haaland chuan international football lamah pawh goal khung a ṭhulh thei lo a, a goal hnih khung hmangin Norway chuan 2-1 in Sweden an hneh.

Minute 20-naah Norway midfielder Morten Thorsby chuan penalty a hlawh chhuak a, kum 21 mi Haaland chuan hei hi goal-ah a chantir - minute 69-naah ṭha zetin a goal hnihna a khung bawk.

Season hman zawh taka Borussia Dortmund tana inelna hrang hranga match 30 a khelh aṭanga goal 29 khung thei striker hian ram tan match 19 a khel tawh a, goal 18 a khung tawh! Kum 2022-ah ram tan match li a khelh aṭangin goal ruk a khung thei.

Sweden-in hun pek belh minute hnihnaah si phurh an sut ṭhen a, Juventus aṭanga Tottenham Hotspur-a loan-a khel Dejan Kulusevski siamsak chu Manchester United forward Anthony Elanga chuan goal-ah a chantir a, mahse, a team tana harhtharna thlen tur erawhin a tlai tawh.

Nations League - League A Results

June 5, Pathianni Zan

Czech Republic 2 - 2 Spain

CZE: Jakub Pesek 4'; Jan Kuchta 66'

SPA: Gavi 45+3'; Íñigo Martínez 90'

Portugal 4 - 0 Switzerland

POR: William Carvalho 15'; Cristiano Ronaldo 35', 39'; Joao Cancelo 68'

League B Results

June 5, Pathianni Zan

Serbia 4 - 1 Slovenia

SER: Aleksandar Mitrovic 24'; Sergej Milinkovic-Savic 56'; Luka Jovic 85'; Nemanja Radonjic 90+2'

SLO: Petar Stojanovic 30'

Sweden 1 - 2 Norway

SWE: Anthony Elanga 90+2'

NOR: Erling Haaland 20' (P), 69'