Curry hoin Warriors an tho chhuak
Golden State Warriors an chesual nawn duh lo, game hmasa lama an hneh loh Boston Celtics lakah Stephen Curry leh Jordan Poole te inlarin 107-88 in hnehna an chang let a, best of seven series-ah team pahnih 1-1 in an inhnehtawk mek.
NBA Finals game 2-ah Curry-a'n 3 points vawi nga ngawt a vawm lut a, a pumpuiah point 29 neiin a team a chakpui. Rebound vawi ruk a lak bakah assist vawi li nei bawkin Warriors tan a thawh hlawk hle.
GSW an chak
Chase Center, San Francisco-a an intawn hmasakah GSW hi an inthlahdah a, quarter hnuhnung berah an chesual a nih kha. Nimin zingah erawh an tihsual lai a siamṭha - Curry hahchawlh laia lut Poole chuan a hna a tlin hle.
Quarter thumna tawp dawn lamah Poole hian a zawnin 3 points vawi hnih a rawn vawm lut, a hnuhnung zawk phei chu quarter tawpna hamrik rik hma chiahin hla tak aṭanga a vawm luh a ni a, fans thawm a ṭha rem rem hle.
Steve Kerr-a nauten inkhel an thunun hneh a, quarter hnuhnung ber tir lamah phei chuan point 25 zeta san fal lai pawh an nei. Hun tawp dawn lamah an player ṭha Curry hahchawlhtir mah se buaina lian tham an tawk ta lo a ni.
Warriors coach Kerr chuan, "Steph kha hahchawlhna hun ka pe zeuh, point a nei a ni satliah lo a, basket venghim tura a hnathawh kha sawi hmaih theih a ni lo. Mite hian defensive lamah a ṭha tawk lo tia sawi an tum ṭhin, mahse a ṭha tawk tih a takin a lantir.
"Ka naute an khel ṭha vek a, team ṭha tak lakah inkhel thunun chunga hnehna chan theih hi a lawmawm. Game 3 atan inbuatsaihna kan nei chhunzawm dawn a, theihtawp kan chhuah ang," tiin a sawi.
Harh ngai Celtics
Game 3 chu Nilaini zing dar 6:30-ah khelh a ni leh dawn. Boston khelmual TD Garden-ah game 4 nen an khel ang, a zawnin khualmualah Warriors an feh chhuak dawn tihna a ni a, vawi hnih chak loh chu a pawi thei tawh ang.
Celtics head coach Ime Udoka chuan, "Kan tan chuan result lawmawm lo tak a ni, Playoff chinah chuan hetiang hi a thleng tur a ni lo," tiin NBA champion vawi ruk ni tawh nen game 2 bika an inthlau lutuk chu a hrethiam lo.
Jayson Tatum-a'n point 28 a nei a, point 17 neitu Jaylen Brown a hmuhnawm bawk. Mahse, anni pahnih bak point nei sang an awm lo, ni danga thawhhona ṭha tak ang kha an lantir theih loh avangin an tuar, chak tur chuan mimal ni loin team khelh ṭhat an mamawh.
Boston Celtics hian NBA title vawi 17 an la tawh a, record nei ṭha ber niin Los Angeles Lakers nen an champion zat a inang. Kuminah hian an champion thei a nih chuan Lakers kalsanin an fal thei dawn, hmabak erawh a hautak ang.
Tun hma lama an sulhnu en chuan Boston tan GSW hi nau en tur an ni. Amaherawhchu, Steve Kerr-a naute hi tun hnai kum riat chhunga NBA roreltu tia sawi theih an ni a, champion tlem zawk ni mah se tunah chuan team ṭha zawk an ni.
NBA Finals
Results & Fixtures
Game 1: Golden State 108 - 120 Boston Celtics
Game 2: Golden State 107 - 88 Boston Celtics
June 9, Ningani
Game 3: Boston Celtics 06:30 AM Golden State
June 11, Inrinni
Game 4: Boston Celtics 06:30 AM Golden State
June 14, Thawhlehni
Game 5: Golden State 06:30 AM Boston Celtics
June 17, Zirtawpni
Game 6: Boston Celtics 06:30 AM Golden State
June 20, Thawhṭanni
Game 7: Golden State 06:30 AM Boston Celtics
(Series-ah 1-1 in an inhnehtawk mek)