Mang rama cheng Wales-in World Cup khel dawn

Ukraine thawnthu ngaihnawm chu tihtawpin a awm a, Wales zinkawng ngaihnawm zawk sawi a ṭul ta - Pathianni zan khan Wales hian an mikhual Ukraine chu 1-0 in an hneh a, World Cup khel turin an inpet tling.

World Cup playoff final inkhela goal awmchhun hi Ukraine captain Andriy Yarmolenko khung a ni a, mahse, anmahni lama a tih goal miau avangin chakpui nan ni loin chak loh nan an hmang ta zawk.

Kum 1958 hnua a vawi khat nan World Cup khel turin Wales an inpet tling a, a vawi hnih nana World Cup khelh tum Ukraine erawhin infiamna khawvela inelna ngaihhlut ber khel turin kum li dang an nghah leh phawt a ṭul.

Cardiff City Stadium-ah Ukraine-in inkhel thunun zawk mah se an besei ber goal an khung thei lo a, Russia nen an indo mek avanga rilru ipik taka awm Ukrainian mipuite tan hlimna an thlen thei lo.

A goal
Inkhelh hmain Wales-in Ukraine duhsakna tinreng an lantir - Wales fan-ten inkhelh ṭan hmain kut bengin Ukrainian team an lawm a, Football Association of Wales chuan Ukraine aṭanga raltlan mi 100 tan a thlawnin ticket an pe bawk.

Mahse, inkhel hamrik a rik rualin khawngaihna chu dah ṭhat a ni a, induhsak a thiang tawh lo - Ukrainian mipuite thinlung natna chu Wales-in hriatthiampui mah se duhthusam an nei ve tho a, an duhthusam a hlawhtlin theih nan Ukraine mipuite rilru an hliam a ngai tlat.

Playoff semifinal lama Scotland lo hneh tawhtu Ukraine-in ni li liam ta ang thoin inkhel hmuhnawm an pho chhuak a, mahse, mahni muala khel Wales an lungphang duh bik lo.

Minute 34-naah Gareth Bale kan hmu a, Real Madrid chhuahsan hlim forward freekick pet aṭanga ball kal chu Yarmolenko chuan an lamah a tauh lut palh a, Wales chuan hei hi chak nan an hmang zui.

Ukraine an vanduai
Midfield-a awm Oleksandr Zinchenko hoa inlan Ukraine an khel ṭha a, mahse, inkhela pawimawh ber goal an khung miau loh avangin World Cup an khel phak dawn lo - an zinkawng tihtawpin a awm.

Wales tan hmuhnawm khawpin goalkeeper Wayne Hennessey a khel chhuak a, Burnley goalkeeper hian Zinchenko, Viktor Tsygankov leh Artem Dovbyk te goal khung tur a dang vek a, Dovbyk-a goal khung tur a dan phei chu pui tak a ni.

Hetihlai hian Wales centre back Ben Davies khelh ṭhatzia sawi hmaih theih a ni lo a, Spurs defender kher hi Wales tana ding ni lo ta se Bale leh a ṭhianten World Cup an khel phak kher lo ang.

Zinchenko-a'n Ukraine tan goal a khungah inngai mah se, freekick pet tura a hmanhmawh hret avangin a goal khung hi pawmsak a ni lo a, Yarmolenko-a'n penalty a hlawh chhuak ngeiah inngai mah se video assistant referee hmanga en a nih hnuah pawmsak a ni lo bawk.

Wales an hlim
Gareth Bale leh a ṭhianten 32% lek ball an chang a, vawi 10 shot an nei a, vawi thum chiah target-ah a kal - Ukraine-in vawi 22 shot an nei a, target-a shot an neih zat hi pakua a tling.

A tirah Wales hi an chi ai a, Joe Allen leh Daniel James ten yellow card an hmu nghal ringawt! Ukraine-in an nawr zui bawk a, mahse, insiamṭhat har lai takin Wales hian goal an khung.

Mahse, Wales hi vanneih vanga World Cup khel tura sawi erawh a rem bik lo. Juventus midfielder Aaron Ramsey chuan goal khungna remchang nei mah se a chhawr lo a, bench aṭanga luhtir Brennan Johnson chuan post a tih per bawk.

Wales tan an thiampuipa Bale chuan hun duhawm bik a nei a, mahse, season thara a club zawm tur an inrinsiak mek forward hian a hun ṭha neih goal-ah a chantir thei lo - vanneih zan ni se Wales hi goal khung belh thei an ni ve tho.

Thawnthu ngaihnawm
Kum 1958-a World Cup an khelh hnuah Wales hian World Cup an lo khel 'teuh' tawh ṭhin hle a, mahse, a hnua an sawi theih san ber chu, "ta se aw..." tih a ni zel.

World Cup 1978 leh 1986-ah khan uiawm taka Scotland phak loin an inpetkai zo lo a, World Cup 1994-ah lah point hnih leka Romania leh Belgium phak loin an khel phak lo bawk.

Kuminah pawh fans tam takin an 'teuh' ral leh mai an hlau a, mahse, tunah erawh a tak ram an thleng ta - Wales football chanchinah Pathianni zana an sulhnu hi nghilh a ni tawh dawn lo.

Heng zawng zawng phena, a kila lung pawimawh chu Bale a ni - kum 58 hnua an major tournament hmasa ber ni turin Euro 2016-ah Wales hi a lo hruai thleng tawh a, semifinal hial a khelhpui. Euro 2020 a tlinpui zui a, tunah World Cup khel turin an tling leh ta - Welsh football an sawina hmun apiangah Bale-a hming a ri tel zel tawh ang.