Mizoramin Haryana an hneh lo

Khelo India Youth Games 2022-ah Mizoram football hmeichhe team chuan nimin khan Haryana 3-0 in an hneh lo. Haryana hian an match hmasa berah Gujarat 2-0 in an hneh tawh a, semifinal khel turin an tling.

Mizoram tan pawh semifinal luh theihna kawng a la inhawng a, knockout stage lut turin group match hnuhnung berah Gujarat an hneh a ṭul dawn. Mizoram leh Gujarat te hi June 8, Nilaini chawhma dar 9:00 hian Panjab University Ground 1-ah an inkhel ang.

Mizoram coach Lizzy Lalhmingsangi chuan, "Ka naute an khel ṭha a, keini aiin Haryana an khel ṭha zawk a ni. Anni chu kum tluana training nei an ni a, academy player an nih hlawm avangin Covid-19 vanga mi nawlpui kan buai lai pawhin training an nei thei a ni," tiin a sawi.

Mizoram hian group match hmasa berah Hnahthial tleirawl Lalrinmawii goal hnih hmangin Odisha 2-0 in an hneh a, Gujarat hian nimin khan Odisha hi an hmachhawn ve bawk. Mizoram hi an goal difference a ṭha lo zawk a nih chuan semifinal lut turin chak a ṭul dawn a ni.

Team manager R. Lalnunsangi (Manuni) chuan, "Kan kutah engkim a la awm a, ka naute kan ringtawk. Semifinal kan luh theih ngei kan ring. Inelna ṭha zawka hmachhawn thei turin kum tluana training ve hi kan mamawh a ni," tiin Vanglaini a hrilh.