Five-Star Lionel Messi!

Lionel Messi-a'n Estonia lakah zahngaihna a lantir lo. Pathianni zan friendly match inkhelah Argentina captain hian goal nga a khung hem mai, an ram hi 5-0 in hnehna a chanpui.

Kum 34 mi Messi hian Argentina tan match 162 aṭangin goal 86 a khung ta. Mahni ram tana goal khung hnem lamah palina niin, a chungah Mokhtar Dahari (89 goals), Ali Daei (109) leh Cristiano Ronaldo (117) te an awm.

Italy nen Finalissima an khelh ṭumin Messi hian goal a khung lo, assist vawi hnih a nei thung. Estonia lakah erawh a duh hun hunah a pet goal emaw ni tih mai tur a ni, match khata goal nga khung hi vawi hnih a neihna a ni.

Barcelona tana a khelh laiin, 2012 Champions League-ah Bayern Leverkusen an sawp ṭumin goal nga a khung. Ram leh club tan match khata goal nga khung thei hmasa ber record chu a siam nghal bawk a ni.

Lionel Scaloni-a enkawl La Albiceleste (Argentina sawina) hi an khel tluang rei ta hle, a zawnin match 33 chhung tlawm nei miah loin an kaltluang ta. Hetih chhung hian Copa America leh Finalissima te an chawi bawk.

Argentina coach Scaloni chuan, "Messi chungchang hi chu thua sawifiah thiam chi a ni lo. A danglamin engkim mai hi duhthusam ang vek a ni a, thuin a sawi theih loh. Ka lawm e, ti chungin hlim takin a inkhel hi en mai tur a ni," a ti.

World champion vawi hnih ni tawh Argentina hi Qatar World Cup khel turin an inpeih tawh hle. World Cup hi November thlaa khelh tur a ni dawn a, a hmain friendly match an la khel leh ang, an tumpui tur ram erawh tih chian a la ni rih lo.