Quartararo-a'n hma a hruai fal

Yamaha rider Fabio Quartararo chuan MotoGP championhsip hmahruaitu a nihna a sawhnghet zel. Pathianni zana tlan zawh tak Catalunya Grand Prix-ah hnehna changin, tualchhung tlangval Aleix Espargaro erawh a che fuh lo.

Barcelona khawpuia intlansiakah hian Espargaro hi pahnihna ni thei tur a ni, mahse a chhut sual palh. Lap a tlan zo tawh emaw tiin a chak a lawm hma hret a, pahnihna ni thei mai tur hi midang pathumin rawn tlan pelin pangana a ni daih!

Spanish rider Espargaro chuan, "Tihpalh tih bak chu sawi tur a vang khawp mai. MotoGP huangah chuan hetiang tihsual hi chu thleng tur a ni lo asin le, ka hmaa tlan Quartararo kha umphak ka duh bakah championship lamah pawh umphak ka duh.

"Mahse, rilru pek tawk loh vangin hun ṭha ka bawhpelh a, kan inkarah point a tam sawt bawk. Hetiang tihsual hi chu a thleng nawn tawh tur a ni lo, team leh min ṭantute chungah ngaihdam ka dil," tiin a sawi.

Intlansiak pakua aṭanga point 147 nei tawh Quartararo chuan, "A tir aṭangin ka vannei, kei chuan kawng kawi hmasa ber hi ka ngai pawimawh thei hle, chuta kan che fuh a nih chuan a awlsam phah ṭhin. A hmasa ber aṭanga tlan ṭan Espargaro hneh theih kha thil lawmawm a ni," a ti.

Championship hmahruaitu Quartararo leh Espargaro inkarah point 22 a awm ta, tam deuh tawh mah se intlansiak pakhat lekah la danglam vek thei a ni. June 19, Pathianni hian Germany GP an tlan chhunzawm leh nghal dawn.

Jorge Martin chu pahnihna niin a hnungah Johann Zarco a thleng thung.