Australia vs UAE: Hmun khat a la awm e!

World Cup-a Asia khawmualpuiin hmun an neih zat chu 4.5 a ni - hmun li hi Iran, South Korea, Japan leh Saudi Arabia ten an hnawhkhat tawh a, hmun ruak pakhat Asia-in an la hnawhkhat thei.

4.5 an tiha .5 hi a awmzia chu Asia chan pum hlum bik a nih loh vang a ni - zanin dar 11:30-ah United Arab Emirates leh Australia ten playoff an khel ang a, he inkhela chak zawk hi World Cup khel turin an tling nghal dawn lo.

South America qualifier-a pangana Peru nen playoff an khel leh phawt ang a, an chak chuan World Cup khel turin an tling dawn - zanin inkhela chak zawk tan match khat chak leh a ngai dawn tihna a ni.

Asia World Cup qualifier third round-ah UAE hi group A-ah awmin pathumna an ni a, an chungah Iran leh South Korea awmin a sang pahnih hi an tling a, annin playoff an khelh a ṭul ta thung.

Australia hi group B-ah awmin Saudi Arabia leh Japan an phak lo a, pathumna ve tho an nih avangin World Cup khel turin playoff match an paltlang a ngaih dawn phah.

UAE tan tlarhmaah Ali Mabkhout chu innghahna a ni leh dawn. Kum 31 mi striker hian ram pawn club lamah tawnhriat nei lo mah se ram tan match 104-a goal 80 khung thei a ni a, Australia tlarhnung tan ven uluk a ṭul ang.

Tlarhnungah kum 36 mi, ram tana match 106 ngawt khel tawh Walid Abbas chu innghahna tur a ni leh ang a, midfield-ah Asian footballer of the year pawh lo ni tawh Omar Abdulrahman chu Australia tan ven bik a fuhin a rinawm.

Australia-in Tim Cahill te hun lai angin player langsar bik sawi tur nei lo mah se European football-a tawnhriat nei ṭha player an kawl nual a, hei hi an ṭhatpui dawn.

Midfield-ah Huddersfield Town leh Brighton & Hove Albion midfielder hlui Aaron Mooy leh Balckpool defensive midfielder Kenny Dougall te an awm dawn a, goalkeeper Mathew Ryan pawh hi La Liga club Real Sociedad tana khel a ni a, Premier League lamah Brighton tan a lo khel tawh bawk.

Scottish Premiership lama a hun tam zawk hmangtu, season liam taa Saudi club Al-Faisaly tana khel Martin Boyle, JLeague club Cerezo Osaka striker Adam Taggart leh Turkish Super Lig club Kasimpasa tana khel Awer Mabil te hi tlarhmaa duhthlan tur awm an ni.

Eintracht Frankfurt tana Europa League nomawi chawi hlim, attacking midfielder Ajdin Hrustic, Middlesbrough midfielder Riley McGree leh Melbourne City forward Jamie Maclaren te pawh theihnghilh loh an ṭha.

Team pahnih vawi ruk an lo intawn tawhah Australia hi vawi thum an chak a, vawi hnih an inhnehtawk a, UAE hi vawi khat an chak - zaninah Peru tum tur zawk a hriat dawn e.

Team pahnih intawn hnuhnung ber chu Asian Cup 2019 quarterfinal kha a ni a, UAE-in 1-0 a hnehna changin, he inkhela goal awmchhun khungtu Ali Mabkhout chu UAE tan a la khel.