Ho Visto Maradona - Napoli

Napoli-in an official twitter banner-ah 'Ho Visto Maradona' tih an hmang a, Italian club ṭantuten Diego Maradona puala an hla phuah niin 'Maradona kan hmu tawh' tihna a ni. Ni e, Italian club hian a hun laia player manto ber ni turin Diego Maradona an lalut a, Argentine forward hian an la chawi ngai loh Serie A nomawi a chawipui avangin Neapolitan ho hian an ngaisang satliah lo - pathian biakin an bia!

Maradona thih thu an puan khan Italian club chuan, "Khawvelin kan thu chhuak hriat an châk tih kan hria, mah se kan na tawrh hi thua sawifiah theih a ni lo. Tun hi a sûn hun a ni. Diego kan hmangaih che," tiin thuchhuah an siam a, an tawrh hi a na bik a ni.

Barcelona-in Boca Juniors aṭangin pound maktaduai 5-in Diego Maradona an lalut a, Catalan club-ah Argentine forward hian harsatna a tawk.

a inkhel thei lo a, September 1983-ah Athletic Bilbao defender Andoni Goikoetxea-a'n hnung lam aṭangin mawi lo takin a ke rek a tlawh 

hliamsak.

1984 Copa del Rey final-ah Barca leh Bilbao te an intawng leh a, Spanish butcher an tih mai Goikoetxea-a'n Maradona hi a tlawh nawn. Mipui 100,000 zetin inkhel an en a, entu zingah Spanish lal Juan Carlos pawh a awm.

Inkhelh banah pate thinthawk a chhuak a, an insual chiam a, Maradona pawh a tal na hle. Mipuiin player, coach leh thlalatute thlengin an vawm a, mi 60 zet an inhliam. Barca hruaitu pakhat chuan, "A chet dan en khan enkawl zui theihah ka ngai tawh lo," tiin chhuahtir an duh.

Catalan club tan beisei a pha tawk lo chungin season hnih chhungin match 58-ah goal 38 a khung a, El Clasico-ah phei chuan Real Madrid ṭantuten a goal khungah kut an beng hial.

80s chho hi Italian football kal vung chhoh lai a ni a, player ṭha pawh an tam. Juventus, AC Milan, Inter Milan, Roma leh Fiorentina te chu club langsar an ni a, Napoli chu a tikimtu chauh a tih theih.

Napoli awmna Naples hi Italy rama khawpui rethei ber zinga mi an ni a, chutichung chuan khawvela player manto ber ni turin Maradona hi an la ngam. Naples khaw club hian club dang hmuh loh Maradona-ah hian an hmu a ni.

Club dangin lak an tum lo erawh a mak hran chuang lo. Juventus-in Michel Plantini leh Zbigniew Boniek an kawl, Inter-in Karl-Heinz Rummenigge an nei, Fiorentina leh Roma ten Socrates leh Falcao te an neih ve bawk avangin Argentine forward hi lak an tum lo.

Amaherawhchu Italian club lian ho hian Maradona hi nei se an ṭha lehzual dawn a, an hriat fuh loh tak hi Napoli erawhin hrefuhin khawvel player manto ber ni turin pound maktaduai 6.5 in an lalut.

Tunlai khawvel nena khaikhin kawp loh chuan Maradona-a'n Napoli a zawm hi a hriatthiam theih loh.

Neymar chuan Barcelona a zawm a, Catalan club-a season hnih a hman zawh khan khawvel player manto ber ni turin chhhuak se, a zawm tur erawh Paris St-Germain ni loin 2014-15 season-a Italian league-a 17-na Atalanta ni zawk se chutiang vel chu a ni.

Hei erawh thil thleng thei a ni lo a, Neymar hian Atalanta hi zawm mah se Serie A hi a champion pui lo ang tih a chiang. Kum 36 liam taah erawh thilmak hi a thleng a, Maradona hian Italian club tenau a zawm a, a ropuina erawh Serie A nomawi a chawipui.

Vawi khat ringawt chu nise vanneih vang a tih theih a, Serie A nomawi hi vawi hnih ngawt a chawipui. Chu chauh a ni lo, Coppa Italia, UEFA Cup leh Supercoppa Italiana-ah te vawi khat ṭheuh a champion pui. 

Napoli hian Maradona chhuah hnuah Serie A nomawi an chawi leh tawh lo a, Neapolitan-in 'Maradona kan hmu tawh' an tih hian an lo hmu chiang em a ni.