Burnley laka harsatna tawk lo 'five star' City

Manchester City chuan Thawhṭanni zan khan Premier League-ah 5-0 in Burnley an sawp a, Liverpool tan champion nomawi chawi turin nghah rih hret a la ngai dawn tihna a ni. 

City tan hian rawlthar duhawm Phil Foden leh Riyad Mahrez ten goal hnih ve ve an khung a, David Silva chuan goal khat a thawh ve bawk. Etihad Stadium-a City lenchilh hi Burnley tan chuan a hautak hret niin a lang.

Pep Guardiola nauten goal an khung hnem zanah inkhel result piah lama ngaihven hlawh tel a awm a, Burnley fans ṭhenkhatin Etihad Stadium-a inkhelh laiin 'White Lives Matter Burnley' tih chuanna banner chu thlawhtheihnain an thlawh kual pui!

Burnley captain Ben Mee chuan, "Khatiang fan-te khan football leh a chhehvela cham ve hi an phu lo a ni," tiin na takin a sawisel zui a, Burnley-in thuchhuah an siam zui bawk. 

Etihad Stadium-ah City-in Raheem Sterling, Kevin De Bruyne leh Aymeric Laporte te ho bench-ah an dah thei a, bench-a player ṭhute man zat belhkhawm ringawt pawh pound maktaduai 200 chuang a ni - Burnley bench-a ṭhu player-te man zat belhkhawmin pound maktaduai nga pawh a tling lo thung. Team pahnih an inthlau a, an thiamna pawh a inthlau tih a lang vat. Minute 22-na lekah City-in goal an khung ṭan a, Phil Foden chuan player hmabak nei êng a ni tih pholangin penalty area pawn aṭangin a khung. 

Minute 43-na a ni a, Mahrez hun a inherchhuak. Algerian forward hian Burnley tlarhnung duh thala chhaih buaiin ball a khalh lut a, a pet goal zui - first half hun pek belhah Sergio Aguero penalty hlawhchhuah chu a pet goal bawk. 

Second half-ah pawh City an insum chuang lo - Bernardo Silva siamsak chu David Silva chuan an goal lina ni turin a khung a, minute 63-naah Foden bawk lo lang lehin chak nemnghehna goal a khung. 

City-ah hmun pawimawh a chan phak loh avangin Foden-a'n a thiamna tak tak a pholang thei lo nia sawi a ni ṭhin a, hun ṭha pek a nih chhunah erawh a bawhpelh lo hle. English midfielder hian goal hnih a khung bakah David Silva goal khungna turin bul ṭantu a ni - a khel a hmuhnawm a, mit a ti tlai hle. 

Spanish playmaker David Silva-a'n season tawp rualin City a chhuahsan tawh dawn a, Foden hian a hmun ruak a luah tur thu City boss Pep Guardiola chuan a sawi zui.

 

Pep chuan, "David-a'n tun season bak kan hnena a cham tawh loh tur thu a sawi khan board hnenah player dang lei kan mamawh loh thu ka hrilh a, Silva thlak turin Foden kan nei sa a ni," tiin a player a fak. 

Spanish manager chuan sawi zawmin, "Joe Hart, Pablo Zabaleta, Sergio Aguero, Yaya Toure leh David-te hian vawiina kan thlen chin hi min hruai thleng tih ka hria a, thlak an harsa hle. Mahse, Foden-ah hian City fan duhawm tak, a inkhelh apianga danglamna min hmuh ṭhintu kan nei a ni," a ti. 

August thlaa a khupa hliam a neih hnua la inlan leh lo Leroy Sane chu Burnley lakah a inlan a, minute 79-naah German winger hi Foden thlak tura luhtir a ni. 

Guardiola chuan Sane hi season tharah a chhuah tur thu kar hmasa Zirtawpni khan a sawi chiang tawh a, Bayern Munich-ah Sane hi kal tura ngaih a ni - German media-te chuan Bayern hian pound maktaduai 36-in City an dawr niin an tarlang leh der tawh. 

Sane hi chhuak dawn mah se Pep-a'n season tawp hma chuan squad chhah a mamawh tih inhriain a ruahmannaah German winger a la tel tih a lantir a, Spanish manager tan thutlukna dik a ni. 

City hian Premier League-ah beisei tur nei tawh lo mah se FA Cup leh Champions League nomawi chawi an la beisei a, league fixture chep tak nen squad chhah an mamawh.