Santosh Trophy Quarterfinal? Mizoram vs Railways
Santosh Trophy vawi 71-naah Mizoram chu Kerala laka 1-4 laia an chak loh avangin thi tawha ngaih an ni a, amaherawhchu Lalsangzuala Hmar hote chungah vanneihnain thla a zar a, Maharashtra-in Punjab an hneh avangin semifinal lut turin an dinhmun a ṭha.
Vawiin tlai dar 4:00 hian GMC Bambolim-ah 2014 Santosh Trophy final remach khelh a ni dawn a, kum thum liam taa Mizoramin nomawi chawi tura an hneh Railways chu inkhel pawimawh takah an hmachhawn leh dawn. Group B match tawp berah hian a chak zawkin semifinal an luh dawn avangin vawiin tlai inkhel hi quarterfinal tiha sawi theih a ni.
Mizoram leh Railways te hi an inhnehtawk a nih chauhin Maharashtra tan semifinal kawng a inhawng dawn a, vawi thum champion tawh Maharashtra hian knockout stage lut turin Group B hmahruaitu Kerala an hneh ngei ngei a ngai bawk ang.
Nat nawnna?
Mizoramin nasa takin football-ah hma a sawn a, hei vang hian Kerala hlawhchhuah hi point thum satliah a ni lo. Mizo thinlungah erawh a let zawngin a thawk a, vawi nga champion Kerala hneh loh hi zahthlak lo mah se chiang taka chak loh hi a na ni.
Mizoram hian nomawi chawi turin Railways hi 3-0 in an hneh tawh a, khami ṭuma goal thumna khungtu F. Lalrinpuia chu player pawimawh a la ni reng. Amaherawhchu Lalfakzuala erawh Kerala nen red card a hmuh avangin a inlan thei dawn lo a, Lalbiakhlua'n a thiamna a la pho chhuak thei rih lo. Mizoram hian semifinal luh theihna kawng hi an bawhpelh a nih chuan tualchhung football ngainatute tan chuan nat nawnna a ni ang.
Beisei a awm
Mizoram midfield-a hmun pawimawh chang V. Lalchhuanawma a dam tawh a, tlarhnungah captain Lalrinchhana kawppui turin Lalhmunmawia a dam tawh. A lawmawm lai ber erawh Mizoram hi result dangah an innghat lo a, hnehna an chang a nih phawt chuan semifinal an lut dawn.
Mizoram manager Lalthanzama Vanchhawng chuan, "Pathianin hun ṭha min pek hi bawhpelh kan tum lo. Maharashtra lo chak lehzel te kha a mak hle. Kan chak loh kha la na viau mah ila, kan tuar thiamin kan rilru a dam tawh, chak tumin khelmual kan pan ang. Mizo mipui min ṭawngtaipui turin kan ngen a ni," tiin semifinal tura beisei an neihsan thu a sawi.
Engtin zel?
Sanga hote hian Maharashtra (3-1) a an hneh hnuah Punjab (0-0) leh Kerala (1-4) te hmachhawnin chak hmel an hmu leh tawh lo. Railways hian Punjab (1-2) leh Kerala (2-4) hneh lo nghal mah se an match hnuhnung berah Maharashtra (1-0) an hneh.
Vawi thum champion tawh Railways hi semifinal kawng sual ko zo tur khawpa an ṭha tawk lo a nih pawhin Mizoram kawng dal thei tur chuan an ṭha tawk. Vawiin tlaiah Santosh Trophy final round group match khelh zawh a ni dawn a, a ngaihnawm dawn.
Vawiin Inkhel Tur
4:00 PM Railways Vs Mizoram
4:00 PM Maharashtra Vs Kerala
# Team Pld W D L GF GA GD Pts
1 Kerala 3 2 1 0 10 5 5 7
2 Punjab 4 1 2 1 4 4 0 5
3 Mizoram 3 1 1 1 4 5 -1 4
4 Railways 3 1 0 2 4 6 -2 3
5 Maharashtra 3 1 0 2 2 4 -2 3