Mizoram Super League tan zan Khatla TBL Vs Chanmari Hollow BBSP

Mizoram chhunga basket­ball inelna sang ber Mizoram Super League Season 3 chu zanin dar 7:00 hian Hawla Indoor Stadium, Republic Vengthlangah khelh ṭan a ni dawn. Champion lai Khatla TBL-in kai thar Chanmari Hollow BBSP an hmachhawn ang a, inkhel en man hi Rs 30 leh Rs 100 a ni ang.

Chetsual awih loh!

MSL3-ah hian club paruk TBL, Hollow, Mission Veng Vikings, Tuikual South, Zarkawt BCA leh Zarkawt Serpents te an inel dawn.

Vawi khat ṭheuh an inkhel kual a, a sang paliin semifinal an inchuh laiin a hniam pahnihin relegation playoff an khel thung ang. Champion leh relegate inkar hla viau mah se MSL-ah chun thil inang lo tak pahnih hi a inhnaih hle. Team ṭha tak tan pawh vawi hnih khat chetsual vangin relegation playoff a khelh theih tihna a ni.

Mapuia Vs Ela

Mizo zinga basketball bika NIS hnuaia coach zir chhuak hmasa ber chu Samuel Lalthlamuana (El-a) a ni a, Chanmari tlangval hian MSL club a enkawl hmasak berah Hollow a enkawl dawn. El-a hmaah Mizo basektball-a hriat hlawh ber H. Laldinsanga (Mapuia) hote a hmachhawn ang.

MSL hmasa bera MVP Mapuia chuan, "NIS coach tawh phawt hi chu tawh an khirh vek a, kan fimkhur khawp ang. MSL-ah tawnhriat nei lo mah se an player-te hi Mizoram aiawha national level-a inlan tawh an nih avangin zuam theih an ni lo," tiin Khatla TBL coach leh player ni kawp chuan a sawi.

NIS coach Mapuia hian a kum zawnin Khatla TBL a champion pui tawh a, tualchhung player ṭha MVP nilai Vanlalmuana, Gos­pel Lalthawmmawia, Nelson Lalrohlua leh Eddie Zaithan­mawia te bakah India national team ti ṭha pha Vishesh Bhriguvanshi leh Garry Gill te an kawl a, zanin hian feet ruk leh inches sariha sang Garry hi a inlan theih beisei a ni.

Ela tan MSL hi thil thar a ni dawn a, basketball inelna sang ber veng leh veng inelna a nih lai chuan Chanmari enkawlin Mizoram an thunun. Tunah erawh Chanmari tlangval hian ama chherchhuah player-te enkawlin Hollow chu MSL-a tlinpui a, inelna tak tak atan an ṭha tawk em tih chu zaninah a hriat ang.

Hollow hian Khatla TBL hmachhawn turin state pawn player Rohit an chhawr hman hmel a, amaherawhchu feet ruk leh inches ngaa sang centre hian sulhnu chhuantham a nei lo. Tualchhung basketball ngainatute erawhin talent nei ṭha Bungkawn tlangval pahnih Vanlalṭhazuala leh Lalnunpuia Renthlei chevel an hmu duh ang.

Chanmari Hollow coach El-a chuan, "Ka player-te hi MSL khel turin an thiam tawk a, tawnhriat nei player hmaa an rilru put hmang hi a pawimawh ber tur a ni," tiin champion lai barakhaih theih an nih thu a sawi.

Entu lam

Khatla TBL hi vawi hnih champion tawh an ni a, Khatla veng chhung mai bak­ah player-te awmna veng aṭangin ṭawiawmtu an nei ṭha ṭhin hle. TBL coach Mapuia chuan, "MSL3-a kan match hmasa berah hian min ṭantu zawng zawng te en turin kan sawm a, ṭha taka kan khelh theih nan ṭawiawmtu ṭha kan neih hi a pawimawh a ni," tiin inkhel en turin mipui a sawm.

Hollow hian playoff-ah veng innghahna an la nei lo a, player tamna Bungkawn lam aṭangin ṭawiawmtu an nei ṭha hle. Zaninah hian Bungkawn aṭangin ṭantu an la nei ṭha reng dawn a, football inelna aṭanga thlir chuan Chanmari veng hian an basketball club hi an thlah thlam lo tawp ang.