CHAMPmarians an champion leh ta

Mizorama cricket inelna ngaiihlut Mapuia Cricket League chu nimin khan khelh zawh a ni a, champion lai Chanmarians chuan run riata Chhinga Veng hnehin an champion.

Suaka Memorial Cricket Ground, Sihhmuia inkhelah ruah a sur avangin over 20-a khelh tur chu over 10-ah tihtawi a ni a, ṭhumvawra vannei zawk Chanmarians-in bat hmasak an thlang.

Chanmari hruaitu Hruaizela

Chhinga Vengin final hmaa Chanmarians nen an inhmachhawn hmasak pahniha an ngam loh Lalhruaizela bawk an ngam lo a, Durtlang tlangval hian ball 25 lek a hmachhawnah run 27 vaw chhuakin over 10-a run 67 an siam theihna turin a thawhhlawk hle. Chanmarians tan ball 13-a hmachhawna run 16 siama a tawp thleng dam K. Lalremruata lam hmaih theih a ni lo.

Chanmarians hian wicket thum chiah an hloh a, Chhinga Veng bowler zingah over hnih a vawma wicket hnih la thei Lalruatdika chu bowler langsar a ni.

3C an chuai

Chhinga Veng target chu run 68-a ni a, match hmasa pahniha an ngam loh tawh Chanmari lakah chak ngei an tum - an target umpha turin over khatah run 6.80 zel siam a ngai. Mahse, 3C tan beisei ang ngawtin thil a kaltluang lo. Opening batsman Saidul Alam chu ball hnih chauh a hmachhawn hman tihin a duck out a, run li siamtu Abhay Joshi-a'n beisei a phak bik lo - run siam hnem ber Jonathan Lalbiakkima run siam zat chu 15 a ni.

3C hian over 10-ah run 59 an tlin thei hram a, Chanmarians tan beisei ang ngeiin F.Vanlalmuanzuala chu bowling lamah innghahna a ni a, over hnih a vawmah run sarih chiah pein wicket hnih a la thei.

Mimal lawmman

MCL5-ah Michael Lalremkima'n a team Kulikawn CC chu final hruai thleng zo lo mah se match rukah run 222 siamin man of the series leh best batsman lawmman a dawng a, Chanmarians off spinner F.Vanlalmuanzuala chu best bowler-ah thlan a ni bawk.

Cricket Association of Mizoram (CAM) leh LPS vision-in kum nga chhung atana inremna an siam chu kuminah zo mah se thawhdunna hi nimin khan pawhsei nghal a ni a, kum hnih dang an thawk dun chhunzawm leh ang.