Spurs-in Chelsea an um

Pathianni zanah Harry Kane-a tel lohna Tottenham Hotspurs-in Christian Eriksen leh Dele Alli te goal hmangin Southampton 2-1 in an hneh a, Premier League hmahruaitu Chelsea awm nuamin an awmtir bik lo.

Spurs hi White Hart Lane-ah league match 10 an chak zawn tawh a, hetiang zat bawk hi league hmahruaitu Blues an phak lohna a ni. Mauricio Pochettino hote hian first half khel ṭha mah se second half-ah nasa taka Southampton lamin hma an sawn avangin mualneitu lam hi an talbuai a, amaherawhchu Saints-in minute 52-naa James Ward-Prowse-a'n goal a khung hnuah goal dang an khung belh thei lo.

Kane thlaktu?

Harry Kane-a'n tun season-ah goal 24 a khung tawh a, heng zinga 19 hi league-a a khung a ni. Mauricio Pochettino-a'n English striker thachhang dawltu atana pound maktaduai 17-a a lakluh Vincent Janssen aiah FA Cup semifinal an luh theih nana Millwall lama hattrick siamtu Son Heung-min a ring zawk.

South Korean forward Son-a goal khung tur chu Saints keeper Fraser Forster-a'n ṭum hnih a dan sak a, second half-ah mikhualin na taka an nawr let avangin tlarhnung pui turin Son aiah Harry Winks dah luh a ni. Hun tawp hma hretin Dutch forward Janssen pawh khelhna hun pek a ni a, goal a khung thei bik lo. Kane tel loin Spurs-in hnehna chang mah se English striker hmunruak hnawh khah a harsat ang.

Eriksen leh Alli

Spurs tan Eriksen leh Alli te an hmuhnawm ṭhin a, hun pawimawhah mawhphurhna an la thei ta bawk. Kum 25-a upa Eriksen hian box pawn aṭangin minute 14-naah a khung a, Danish midfielder ball pet thiam zia a lang nawn. Minute 33-naah Spurs-in penalty an hmu a, Kane awm lo mah se Alli-a'n cool takin keeper Forster bumin goal a khung.

Champion beisei?

Tottenham defender Jan Vertong­hen chuan, "Chelsea hi cham­pion tura rinkai an ni a, amaherawhchu beisei kan la neih chhung chu theihtawp chhuahin kan um zel ang. Kan khel ṭha thawkhat a, a ṭha thei ang ber nih kan tum a, chak zel kan mamawh a ni," tiin champion a la beisei thu a sawi.