Etihad Stadium-ah chak zawk an awm lo ; Champions League khel tur inum boruak a sang

Season ṭantir khan Man­chester City, Liverpool, Man­chester United leh Arsenal-te hi Premier League nomawi chawi tura 'inum' tur tiin sawi ila, hnial ngam an vang ngawt ang - mahse, club lian pali tan beisei angin thil a kal ngawt lo. Premier League match 10 bak khelh tur a awm tawh lo meuh chuan heng club-te hi champion inchuh ni loin season thar atana 'Champions League' khelh inchuh an ni tawh.

Pathianni zan khan Etihad Stadium-ah Manchester City chuan Liverpool an mikhual a, goal khat ve ve khungin an inhnehtawk. Inrinni zana Arsenal an chak loh laiin Man­chester United chuan khual­mualah Middlesbrough 3-1 a an hneh thung avangin parukna aṭangin panganaah an invawrh chho a, Gunners hi parukna dinhmunah an awm thung - Champions League khel tur a chiang lo tawlh tawlh.

City chhantu Aguero

Etihad Stadium-ah City leh Reds-in inkhel hmuhnawm an chhawp chhuak a, team pahnihin point thum aia hniama lungawi an tum loh avangin goal khung tumin an innawr tawn zak zak - vannei hmasa zawk chu Liverpool an ni. Minute 51-naah Gael Clichy chuan penalty area-ah Roberto Firmino a tih tluk avangin penalty a chawi a, James Milner-a'n petin a club hlui lakah zahngaihna a lantir lo.

Minute 69-na a ni a, Reds-in ṭum danga an ngam loh ṭhin Sergio Aguero bawk an ngam lo. Argentine striker hian Kevin de Bruyne ball cross ṭha tak chu si phurh sutna goal ni turin a khung a, Premier League-a Liverpool a mikhual hnuhnung pangaah goal a la khung vek! Mahse, Aguero hian a hnu lawkah hnai set sawt aṭangin hun ṭha a hlah a, heta ṭanga ball kal zel hi De Bruyne chuan post pet per nan a hmang zui.

Liverpool-in point thum an hlawhchhuah loh avangin dem tur an zawng dawn a nih chuan Adam Lallana chu dem tur a ni. English midfielder hian Firmino-a ball pek chu hnai set sawt aṭangin goal ruakah a pet ṭhelh!

Hun tawn danglam

Manchester City manager Pep Guardiola, "Liverpool leh City ka lawmpui a, hetiang hun hi ni nuam ka tiha ka inchhuan ṭhin em emna chu. Manager dinhmun ka luahna hi a la rei hran lo a, he hun tawitea ka hun tawn danglam leh nuam ber pawl chu vawiin hi a ni. Champions League aṭanga petchhuah kan nih avangin rilru a hnual a, mah se vawiinah khan kan insiam-

ṭha nghalin ka hria. Kan rilru a paukhauh a, huaisen takin kan bei a ni. Mahse, Liverpool hi team ṭha tak an nih miau avangin kan duhthusam ang taka nawr erawh a harsa a ni," a ti.

Pep chuan sawi chhun­zawmin, "He club-ah hian cham reng ka duh a, kan match tawp ber thlengin Champions League khelh tumin kan bei ang," a ti. Pathianni zan inkhelah hian referee Michael Oliver thutluknaah sawisel tur a awm nual. Sadio Mane tihtluk a nih avanga penalty an hmu lo chu Reds tan lungawi lohna tur a ni a, Yaya Toure-a'n Emre Can awma (chest) a tlawh avanga red card a pumpelh chu a vannei a, Milner-a'n Raheem Sterling a tihtluk vanga Reds-in penalty an chawi lo chu 'vannei' tih loh rual a ni bik lo.

Liverpool boss Jurgen Klopp chuan, "Sadio Mane kha penalty pek ngei tur a ni a, a ti tlutu Nicolas Otamendi kha red card pek tur a ni bawk. Hetiang ang game boruak sangah chuan kha chauh pawh kha hnehna chan nan a tawk dawn a ni. Chutihrualin City khan penalty hmuh an phu ve tho a, 1-1 pawh hi result awm tak chu a ni tho. Ka player-ten an khel ṭha a, hun tawp hamrik a rik rual khan hlim luih chu har ti viau mah ila City khelmuala ṭha taka khelha point hlawhchhuah hi a chhe lo a ni," tiin a naute khelh danah a lawm thu a sawi.

Palina beisei United

Manchester United chuan ni 184 hnua a vawi khat nan parukna dinhmun a chhuahsan ve ta a, Pathianni zan khan tlak hlauhthawn awma ding mek Middlesbrough chu khualmualah 3-1 in an sawp. Boro hian an coach Aitor Karanka chu United an mikhual hma hian an ban a, Championship aṭanga kaisanpuitu coach tel loin Boro-in eng ruai an ang lo.

Jose Mourinho-a naute tan Marouane Fellaini, Jesse Lingard leh Antonio Valencia ten goal khat ṭheuh an khung a, Boro tan Chris Smalling tihsual zar zoin substitute Rudy Gestede chuan goal khat a khung ve bawk. United-in Boro an hneh hi Premier League-a match 600 hnehna an channa chiah a ni a, English club zingah Premier League-a heti zat chak hmel hmu thei dang an la awm lo.

Manchester United manager Jose Mourinho chuan, "Kan rilru puthmang, kan chak duhna thinlung leh kan khelhdan khan fak a phu a ni. Europa League quarterfinal kan luh kara hnehna kan chang thei hi ka lawm takzet. Palina dinhmun kan hnaih theih nan point thum kan hmuh belh a, tunah chuan kan tan Champions League kawngkhar hmun hnihah a inhawng ta," a ti a, league-ah palina ni lo pawh ni se Europa League nomawi hmanga Champions League khelh theih a inbeisei.