BCCI member thar Mizoram?

Supreme Court-in India rama cricket thu­neitu sang ber Board of Control for Cricket in India (BCCI) tana kalphung thar ruahman sak tura a ruat Committee of Admi­nistrators (COA) chuan Mizoram chu BCCI hnuaia member ni turin a pawm a, Manipur, Me­ghalaya, Nagaland, Arunachal Pradesh, Sikkim, Uttarakhand leh Telangana-te chu full membership pek tur zingah an tel bawk.

COA-in BCCI tana dan thar a duanah chuan state tin aṭangin BCCI member pakhat chauh an awm tur a ni tih a ni a, hei vang hian Maharashtra-in membership an neih tho avangin Mumbai chu BCCI-ah hian member pangngai an ni thei tawh dawn lo a, Baroda leh Saurashtra-te nen associate member ringawt an ni tawh ang.

Ruahmanna thar ang chuan BCCI kumtin intawhkhawm chu September 30-ah neih ziah tur a ni ang a, BCCI kaihruai tur Apex Council chu kum thum danah thlan tur a ni ang. Apex Council-ah hian member pakua an awm ang a, president, vice-president, secretary, joint secretary leh treasurer-te chu thlan ṭhin tur niin member dang pali chu BCCI hnuaia full membership nei aṭanga ruat pakhat, India cricket team mipa leh hmeichhe aiawh pakhat ve ve leh Comptroller and auditor general (CAG) aiawh pakhat an ni dawn a ni.

BCCI office chu chief executive officer kaih­hruaina hnuaiah kalpui a ni ang a, CEO hi hun puma thawk manager paruk-in an ṭawiawm ṭhin ang.