Chuai thei lo Roger a ropui zel
Roger Federer-a'n chuai lam a pan thei lo! Grand Slam vawi 18 champion tawh Federer hian Pathianni zan kan Stan Wawrinka hnehin BNP Paribas Open nomawi a chawi; ATP Indian Wells Masters 1,000 title hi vawi nga a lakna chiah niin California-ah hian Novak Djokovic nen an champion zat a inang.
Indian Wells-a inkhelah Federer hian darkar khat leh minute 20 chhungin 6-4, 7-5 in hnehna a chang. Federer hian harsatna nei loa set hmasa a lak hnuah set hnuhung zawhah a talbuai hman teuh hle. Game hmasa berah a service hlohin 0-2 in a hnufual hman a, a tawpah erawh a zawna game thum lain hnehna a chang - ṭum dang ang bawkin hun pawimawhah a chefuh leh tlat.
Swiss tlangval Federer hi tunah chuan kum 35-a upa a ni tawh a, ATP hnuai inelna zingah Grand Slam tih loha ngaihhlut ber Masters title la thei upa ber a ni. Kum 2004 khan khatih hun laia kum 34-a upa Andre Agassi chuan Cincinnati Open nomawi a lo chawi tawh; Federer hian US hranghlui Agassi record hi a rawn khum.
Indian Wells champion thei upa ber ni bawk Federer chuan, "Australian Open ang em kha chuan min barakhaih lo deuh, mah se America-a ka champion leh thei hi a mak a, chawlhkar nuam leh duhawm a ni," tiin a sawi. Federer hian kum 2004, 2005, 2006 leh 2012 te khan Indian Wells-ah hian hlawhtlinna a lo chang tawh a, nikum khan hliam vangin a inlan lo.
Grand Slam vawi thum champion tawh Wawrinka chuan, "A la che rang em em a, a chhak leh thlangah ball a invuak chhawk theih avangin min tlan kual tir nasa hle. Harsa taka ka vuak phei pawhin ani chuan a chinfel dan a lo thiam zel," tiin vawi 23 an inhmachhawn tawha ṭum 19 a hneh loh Federer a dah sang hle.
Federer chuai lo
Khawvel mipa tennis player piang tawh zinga ropui bera chhal ngam Federer hi nikum khan a hnungzâng leh khup a hliam a, Wimbledon semifinal hnu lamah inkhel tawh loin season chawhnu lam zawng a chawl.
Season hmasa a chawlh hma chhan hi a hliam vang chu ni bawk mah se hun rei zawk inkhelh a duh vang a nih thu a sawi a, kuminah a chhanna a hmu chiang hle. Tun season-ah world number 17 ni chungin kum bul a ṭan a, Grand Slam hmasa ber Australian Open final-ah ropui taka Rafael Nadal hnehin nomawi a chawi.
ATP Masters 1,000 tournament an ṭan a, world number 10 Federer hi rinkai a ni phak lo. Mahse, Andy Murray leh Novak Djokovic ten beisei an phak lo a, a elpui ber Nadal leh Wawrinka a hneh nawn thei bawk. Kuminah match 14 a khelh aṭangin vawi khat chiah chak loh a la nei a, hnehna a channa ṭum rukah hian ranking-a a sang player paruk ngawt a hneh.
Tennis a khelh hun chhunga nomawi 90 chawi tawhtu Federer hi tunkara ranking chhuak thar berah chuan world number 6 a ni leh tawh dawn a, amah aia kum naupang zawk leh vanglai hmang mek te lakah zam loa a inkhelh chhuah theih miau avangin nomawi tam zawk a chawi belh zel a nih pawhin a mak lo ang.