Swiss Open champion Lin Dan

Badminton World Federa­tion (BWF) hnuaia inelna ngaihhlut pakhat Swiss Open final-ah Lin Dan chuan Shi Yuqi lakah straight game a hneh­na changin nomawi a chawi.

Pathiannia St. Jakobshalle-a inkhelah seeded pakhatna Lin Dan hian bul a ṭan ṭhat loh zawk hnuah 4-4 a nihpui leh a, game hnuhnung zawkah erawh hnufual lai nei loin harsatna a tawk lo - miute 31 chhungin 21-12, 21-11 in hnehna a chang.

All England Open khelh zawh tak semifinal-ah Chinese shuttler pahnihte hi an lo intawng tawh a, he mi ṭum hian Shi a chak. Tun ṭumah erawh Olympic gold medal vawi hnih dawng tawh Lin Dan a chungnung ve thung.

Kum 33-a upa Lin Dan hian Beijing leh London Olympic-ah gold medal a dawng a, World Championships-ah ṭum nga champion tawhin silver medal vawi khat a la tawh bawk. Feet 5 leh inches 10 a sang Chinese tlangval hian Asian Games leh Asian Championships-ah pawh gold pali ve ve la tawhin BWF Super Series Masters Finals title pakhat a la tawh bawk - badminton chanchina player hlawhtling pakhat a ni.

Hmeichhe singles lamah beisei loh result kan hmu. Seeded pawh chang phak lo Chen Xiaoxin chuan seeded pathumna Chen Yufei lakah 21-19, 21-14 in hnehna a chang. World number 64 Xiaoxin hian semifinal-ah Indonesian shuttler Fitriani Fitriani chu a lo barakhaih tawh bawk.