Barcelona an chak ve leh ta

Luis Enrique-a enkawl Barcelona-in khualmuala Deportivo La Coruna an ngam loh hnuah an tho lehnghal a, Pathianni zan khan an mikhual Valencia chu 4-2 in an hneh. Catalan club tan Lionel Messi chuan goal hnih a khung bakah Luis Suarez leh Andre Gomes ten goal khat ve ve an khung a, Valencia tana Eliaquim Mangala leh Munir El Haddadi goal khungin awmzia a nei lo.

Mangala channa!

Nou Camp-ah Barcelona-in chak an mamawh tih inhre mah se rin loh taka goal khung hmasa zawktu chu mikhual team Valencia an ni. Barcelona aṭanga loan-a an hawh Munir El Haddadi chu a khelmual hriatchianah a tlangnel a, minute 29-na leka a hun ṭha neih chu Barca keeper Marc-Andre ter Stegen-a'n a dan sak a, Valencia-in corner an hmu. He corner aṭanga ball kal hi defender Mangala chuan a lo khung a, Barca an hawihai.

Mahse, Valencia tlarhnung an talbuai a, mual dinglam sirah Luis Suarez vengtu Ezequiel Garay lu a hai ṭhin hle. Goal an chhuah aṭanga minute rukna lekah Barca-in an si phurh an sut ta nge nge a, Neymar-a throw-in aṭanga ball kal chu Suarez-a'n a khung. Barcelona an phur chhunzawm a, minute 45-naah goal khungtu Mangala a chesual.

Manchester City aṭanga loan-a Valencia-in an hawh de­fen­der hi Luis Suarez lakah a foul a, penalty area a nih avangin Barca-in penalty an hmu - yellow card hmu tawh sa Mangala hnawhchhuah a ni bawk. A pet tur­in Messi a lo pen chhuak a, hmahruaina goal ni turin a khung.

Hei le Barca

Barcelona-in an hmahruaina goal an khung hnu lawkah Barca-in an defending chhiat an tuar ve chhunzawm nghal a, El Haddadi chuan loan-a chhuahtirtu a club lakah theihna a nei a ni tih pholangin first half hun pek belhah an si phurh a sut - chawlhlawk hman a nih laia inkhel dinhmun chu 2-2 a ni.

Second half ṭan a nih aṭang­a minute sarihna lekah Lionel Messi a inlar chhunzawm a, Valencia goalkeeper Diego Alves bumin an goal thumna a khung - Messi hian tun season league match 25 a khelhah goal 25 a khungna chiah a ni. Barca-in goal khatin hma hruai mah se manager Luis Enrique-a'n tlarhnungah a naute an talbuai tih a hria a, substitution awmze nei a siam.

Ivan Rakitic la chhuakin defender Sergio Roberto luhtir a ni a, a hnunga defender pathum ding chu paliah a thlak. Barca an khel ṭha sawt a, ngaih ngam takin player 10 nichunga khel Valencia an nawr chhunzawm. Minute 89-naah Barca-in an goal lina an khung leh ta nge nge a, Andre Gomes chuan Neymar hnen aṭanga a ball hmuh chu a khung - Barca tan Brazilian forward Neymar-a'n goal khung lo mah se a khel ṭha hle.

Enrique thukhawchang

Barcelona head coach Luis Enrique chuan, "Inkhel hmuh­nawm tak a ni a, hun tawp thlengin team pahnih khan chance hlauhawm tak tak kan nei reng a ni. Game ṭha tak kan khel a, Valencia khan an khelh ṭhat em avangin chutiang tur chuan min pui a ni. Chance tam tak kan neih avangin hei aia tam zawk pawha chak thei kan ni," a ti.

Enrique chuan sawi chhun­zawmin, "Khingpui harsa tak lakah point thum kan hlawh chhuak a ni," tiin a naute khelh danah a lawm hle.

Sevilla ngamtu Atletico

Season thara Champions League khelh ngei tum Atletico Madrid chuan pathumna Sevilla chu 3-1 in an hneh a, Jorge Sampaoli naute hi point hnih chauhin an phak tawh lo - Champions League aṭanga Leicester City-in an petchhuah hlim Sevilla tan March thla hi thla duhawm taka chhiar chi a ni lo!

Atletico tan Diego Godin, Antoine Griezmann leh Koke ten goal khat ṭheuh an khung a, Sevilla tana Joaquin Correa goal khung chu mualpho lutuk tur khuhna chauh a ni. Atletico tan result piah lamah chanchin lawmawm a awm a, Deportivo an hmachhawn ṭuma khelmual chhunga nikhaw hre loa tlu Fernando Torres chu khelmualah inlanin minute 63-naah Kevin Gameiro a thlak.