Monaco tan Kylian Mbappe langsar zel
Rawlthar duhawm Kylian Mbappe-a'n goal khung a chawlhsan thei lo. Kum 18-a upa Mbappe hian Pathianni zan French Ligue 1 inkhelah goal hnih khungin AS Monaco chu Caen lakah 3-0 in hnehna a chanpui.
France tana khel tura an koh tawh Mbappe hian minute 13-na lekah Caen defender pahnih paltlangin goal hmahruai a khung a, chawlhlawk hma deuhin penalty a hlawhchhuah chu Fabinho-a'n goal-ah a chantir bawk. Hun tawp hma minute kua chauh a awm tawh tihah Mbappe hian an goal thumna a tauh lut leh bawk.
Mbappe hian tun season-ah a club tan inelna hrang hrangah match 29 a khelh aṭangin goal 17 a khung tawh a, a club hi league table-ah hma a hruaipui mek. Champions League last 16-a Manchester City an hmachhawn ṭuma goal hnih a khung theih avangin Pep Guardiola nauten a hlauhawm zia an hrechiang ang.
Inkhel dangah Paris St-Germain chuan Lyon 2-1 in an hneh. Parc des Princes-a inkhelah PSG tan Adrien Rabiot leh Julian Draxler ten goal an khung. Champion lai PSG hian league match 30 khelh aṭanga point 68 hmuin table-ah pahnihna an ni a, hmahruaitu Monaco an phak lohna chu point thum a ni.