Hun pawimawhah Muller

Thomas Muller-a'n Bundesliga match 250 a khelh tlin niah Bayern Munich tan goal khat khungin a club hi Borussia Monchengladbach lakah 1-0 in hnehna a chanpui. Bayern hian league table-a anmahni hnaih bertu RB Leipzig chu point 13 zetin an kalsan ta.

Pathianni zan inkhelah Carlo Ancelotti-a nauten inkhel thunun chungin goal an nei thei mai lo. Winger Arjen Robben-a'n goal ban a tih per chu first half-a an chance neih ṭhat a ni. Second half-ah striker rinrawl Robert Lewandowski-a'n a hun ṭha a bawlhpelh hnuah Thiago Alcantara thawhrah sangtu Muller chuan goal awmchhun a khung.

Germany inter­national Muller hian tun season Bundesliga-ah goal hnih chiah a la khung a, a goal khung erawh point thum hmuh nan a tawk. Bayern hian a zawna season nga chhung league nomawi chawi thei turin an ke an chhep rem tawh.

Bayern Munich coach Carlo Ancelotti chuan, "Europa League khel zo hlim an nih avangin Borussia kha an nem deuh turah kan ngai a, mah se beisei ang ngawt an ni lo. Kan khel ṭha hle a, chutihrualin kan vanneih ni ni lo se la chuan point hloh thei dinhmunah kan ding," tiin a sawi.