Black Lives Matter leh Burnley

Premier League hian league khelh ṭan leh a nih hma khan league match hmasa 12-ah player-te hming aiin kawr hnungah 'Black Lives Matter' tih a chuan tur thu an sawi a, inkhelh hma emaw inkhelh laia vun rawng inthliarna dona lantir nana player an ṭhingṭhi a nih chuan an thlawp tur thu an sawi bawk. 

Manchester City leh Burnley inkhelah pawh player-ten an hming aia 'Black Lives Matter' tih chuanna jersey an ha a, inkhelh hmain he movement an thlawpzia lantir nan hian an ṭhingṭhi bawk - hetihlai hian Burnley fans 

ṭhenkhatin 'White Lives Matter Burnley' tih an lo thlawhpui ve thung!

May 25 khan mihang pakhat George Floyd chu Minneapolis, USA-ah police kut tuarin a thi a, heta ṭang hian vun rawng inthliarna duh loin khawvel hmun hrang hrangah campaign neih a ni -  'Black Lives Matter' tih hi thupuiah an hmang. 

Burnley chuan thuchhuah siam nghalin, "Premier League, Manchester City leh Black Lives Matter movement atana hnathawk zawng zawng te kan thinlung takin ngaihdam kan dil a ni," an ti a, vun rawng inthliarna lam hawia che duh fan-te chu an khelmual Turf Moor-ah an lawm loh thu an sawi.

Hetiang boruak karah hian banner chuanna thlawhtheihna thlawh chhuahna Blackpool Airport chuan an ṭum hmun aṭanga banner nena thlawhchhuah chu an khap rih thu an puang.