Liverpool an la champion thei lo!

Thawhṭanni zan Premier League-ah Manchester City-in Burnley an sawp avangin Liverpool tan champion turin nghah hret a la ngai dawn a, zanin dar 12:45-ah Crystal Palace hneh pawh ni se Reds hi an la champion thei lo. 

Premier League khelh chhunzawm leh a nih hma khan Liverpool-in champion turin point ruk an la mamawh a, an match hmasa pahniha an chak chuan an champion thei tihna a ni. 

Mahse, Reds hian an match hmasa berah Everton an hneh zawh loh avangin Crystal Palace laka champion tur chuan Burnley-in City laka point an hlawhchhuah a ngai a, Burnley an hlawhchham chiang hle. 

Liverpool-in match hmasa bera Everton an inhnehtawkpui avangin champion tura an mamawh zat chu point nga a ni mek a, zaninah Palace hneh ta se an champion theih dan a awm - mahse an nghah hret erawh a ngai thung ang. 

Ningani zan dar 12:45-ah Chelsea-in Manchester City an mikhual dawn a, City hian Stamford Bridge-ah hnehna an chang zo lo a nih chuan Liverpool an champion ang. 

Frank Lampard naute hi season thara Champions League khelh tum an ni a, City lakah tha an thlah ring suh. A tawi zawnga sawi chuan Liverpool an champion ngei dawn a, hawina lam apianga match hi an tana 'ṭha tur' a ni thei deuh zel!

Liverpool-in Palace hneh mah se, City-in Chelsea an hneh zui chuan Liverpool an la champion dawn lo. Mahse, Reds fan-te tan thu hriat nuam a awm. July 2 zanah City an lenchilh dawn a, an chak chuan an champion ang. 

A hmunah inkhel en theih loh mah se Etihad Stadium ngeia champion hi Reds fans tam takin an chak ang tih a chiang a, Chelsea hian hna lo thawh sak rih lo se, tia ngaihtuahna seng an awm a nih pawhin an demawm loh ang. 

City leh Liverpool boruak hian Reds leh United boruak phak lo mah se Premier League (2013-14) leh season hmasaa champion beisei Liverpool-in City an phak loh dan kha fan-ten an la theihnghilh lo a, City khelmual ngeia champion hi an châk dawn!

A chunga kan tarlan zawng zawng a thlenna tur chuan Liverpool-in Everton laka an khelh dan ang mai maia an khelh a rem lo a, Crystal Palace lakah point thum an hlawhchhuah ngei a ṭul dawn. 

Mahse, Liverpool tan tun hnaia result nei ṭha Palace hneh hi hna awlsam a ni dawn lo. Reds manager Jurgen Klopp chuan, "Crystal Palace inkhel ka en a, hnum taka enkawl khawl an ang berin ka hria. 

"Premier League-a an match hnuhnung paliah goal an chhuah lo vek a, 100% in chak a harsa dawn tih ka sawi ngam a ni. Mahse, hei hi Premier League nihphung chu a ni a, buaina kan nei lo ang," a ti a, a inpeih tawh. 

Inlan tur

Everton lakah hliam vangin James Milner leh Joel Matip-te lakchhuah an ngai a, player pahnih inhliam hi ngaihtuahawm ni lo tura ngaih ni mah se zaninah an inlan a la rinawm loh. 

He thu buatsaih thleng hian Andy Robertson dinhmun a la chiang lo a, Dejan Lovren leh Joe Gomez an la awm tho avangin lungphan lutukna tur erawh niin a lang lo.

Everton laka bench-a ṭhu tluan Mohamed Salah chu khel ngei tura ngaih a ni a, Roberto Firmino leh Sadio Mane te nen an rawn inkawp thei a nih chuan Crystal Palace tlarhnung tan rilru 

ṭawngṭaina nena khelh a ngai ang.