Djokovic-a'n Covid-19 a kai

Tennis world number one Novak Djokovic leh a nupui Jelena Djokovic chuan Covid-19 an kai tih nizan khan puan a ni a, Serbian tennis player leh a nupui hian ama buatsaih inelna Adria Tour aṭangin he hri leng hi an kai - an fate erawh an fihlim thung. 

Adria Tour-a inlan zingah Djokovic hma hian Grigor Dimitrov, Borna Coric leh Viktor Troicki te chuan he hri leng an kai thu hi an lo sawi tawh a, inelna aṭangin hri leng hi an kai. 

Kum 33 mi Djokovic hian Belgrade khawpuiah amah thoa Serbian mi Viktor Troicki hi match hmasa berah a hmachhawn a, Troicki-a'n he hri leng a kai thu an tihchian hnuah a kai tih hriat a ni ve leh ta a ni. 

Coronavirus hri leng vangin February hnuah ATP hnuaiah inelna a awm lo a, Adria Tour hi Djokovic-a huaihawt niin ATP Tour event a ni lo. 

Serbia-a first leg inelnaah entu mipui 4,000 zet an pungkhawm a, player-te chu Belgrade khawpuia night club-ah an chhuak ho! Croatia-a second leg khelh a nih 

ṭum pawhin lockdown dan thlah dul a nih avangin an inkhelh zawhah player-te chu inchibaiin an inkuah a ni. 

Alexander Zverev, Marin Cilic leh  Andrey Rublev-te chu inlan zingah tel mah se an negative a, heti chung hian ni 14 an inkhunghran tur thu an sawi. 

Andy Murray chuan tennis player-ten Covid-19 an kai chu an tan zirlai a nih thu a sawi a, Australian tennis star chanchin ngah Nick Kyrgios chuan Adria Tour neih chu, "Thutlukna atthlak tak a ni," tiin a sawi bawk.