Goal 5 thuntu Mizoram semi final lut
Santosh Trophy vawi 71-naah Mizoramin semifinal an lut - nimin khan Railwayd 5-1 in an sawp.
March 23, Ningani tlai dar 3:00-ah Group A hmahruaitu West Bengal chu semi final-ah an hmachhawn ang.
Nimina Bambolim Sports Complex-a inkhelah Mizoram tan F. Lalrinpuia'n goal hnih a khung a, V. Lalchhuanawma, Lalrinchhana leh Lalsangbera ten goal khat ṭheuh an khung.
Mizoram hian 2014 Santosh Trophy final-ah Railways 3-0 in an hneh a, Lalsangzuala Hmar hoten West Bengal hmachhawn turin an inpeih tih lantir nan 5-1 in an sawp nawn.
Inkhel dangah Kerala-in an player ṭha dah ṭhain Maharashtra 0-2 in an hneh lo a, Group B hmahruaitu Kerala hian semifinal pakhat zawkah inelna thlengtu Goa an hmachhawn ang.
Team thar
Mizoramin an match hnuhnung berah Kerala 1-4 in an hneh lo a, coach Lalsangzuala Hmar-in Railways hmachhawn turin player pasarih a thlak.
Police winger Fakzuala leh Ramhlun North FC defender Israel Laldingngheta chu hrem vangin an inlan thei lo.
Santosh Trophy-ah kum Under 21 player pathum starting eleven-ah luhtir ngei ngei a ngai a, he dan tuartu chu Chanmari FC goalkeeper Lalmuanawma a ni. Qualifier match hnihah a inlan lo a, final round atana inpuahchahna NM Gupta Football-ah best keeper atan thlan ni mah se final round match thumah Under 21 player zawk goal keeper-ah an dah avangin a inlan lo.
Railways nen a vawi khat nan Muanawma'n inkhel bul a ṭan a, tlar hnungah Under 21 player pahnih Lalmalsawma leh Lalhmunmawia te an lut a, midfield-ah Under 21 player Lalrinchhana a awm bawk.
ONGC player V. Lalchhuanawma a dam tawh a, midfield tichak turin inkhel bul rawn ṭanin tlar hmaah Police forward pahnih Lalbiakhlua leh Lalsangbera chu starting eleven-ah koh let an ni a, Chanmari FC forward Lalrammawia chuan a vawi khat nan final round-ah inkhel bul a ṭan bawk.
Chhuantea telna
Mizoramin inkhel bul an ṭan ṭha a, minute 10 pawh a ral hmain F. Lalrinpuia ball pet chu goal pawnah chiah a kal nghal. Hemi hnu hian Chanmari FC midfielder Lalrinchhana ball tauh chu a goal teuh viau bawk.
Minute 24-naah Chhuantea'n a hun ṭha neih hmasak ber chu goal-ah a chantir a, box pawn aṭangin a pet goal. Mizoram an khel ṭha zawk a, Biaktea erawhin vanneihna a la nei lo. Keifang tlangval Biakea hian a hun ṭha neih a hlah a, Sanga hote an la him lo.
Soosanayakam a inlar!
Railways hian Mizoram an hmachhawn hmain goal li an khung a, own goal pakhat tih loh chu Rajesh Soosanayakam khung vek a ni.
Railways jersey no. 10 Rajesh hian goal hmaah a ṭha bik tih pholangin minute 38-naah vei lam aṭanga ball cross chu a tauh goal. Half time-ah 1-1 a ni a, inkhel pakhat zawkah Maharashtra-in Kerala lakah 1-0 a hma an hruai mek bawk avangin Mizoram chu tla thei an ni.
Mizo ral a lian
Second half-ah Mizoramin bul an ṭan ṭha nghal a, Railways-in goal venhim tum ngial mah se an dang zo lo.
Minute 57-naah midifielder Rinchhana'n mahni hma sial lo takin Valpuia a pe a, Republic Veng tlangvalin a tawnhriat hmang ṭangkaiin awlsam takin a khung.
Mizoram tan Police player an langsar a, minute 70-naa Police forward Sangbera ball fing tak chu Rinchhana'n a pet goal. Electric Veng tlangval Rinchhana a thawkrim a, a goal khung hi a pawimawh takzet. Minute sarih hnuah Police forward Valpuia'n penalty a hlawh chhuak a, Dawrpui tlangval Sangbera'n goal lina ni turin a khung.
Mizoram goal liah an lungawi lo a, minute 84-naah vei lam aṭanga substitute Ramfangzauva cross chu Valpuia'n chiang zetin goal kilah tak a khung a, Mizoramin vawi thum champion tawh Railways lakah goal nga an khung.
Sanga hote hi Maharashtra leh Kerala inkhel result-ah an innghat tawh lo a, an thiam vangin semifinal an lut.
Mizoram an lawm
Mizoram coach Lalsangzuala Hmar chuan, "Tuna kan chak hi team pumpui thawhrah a ni a, kan inlungrualna ṭhat vang a ni. Railways 5-1 a kan hneh thei hi kan lawm... Chhuantea a dam tawh a, khelmual chhungah a ṭangkai khawp mai," a ti.
Mizoram manager Lalthanzama Vanchhawng chuan, "Hnehna kan chan avangin kan lawm a, min awmpuitu Pathian chungah lawmthu kan sawi a, kan hnunga ding tlattu MFA leh Mizo mipui chungah kan lawm takzet a ni. Dinhmun ṭha lo taka kan din lai pawhin MFA hruaituten min thlamuan a, hun pawimawhah Goa-a Mizo awmten khuang nen min rawn ṭawiawm a, lawmna tur hlir a ni," tiin Vanglaini palai a hrilh.
Champion lai an tla
Santosh Trophy vawi 71-naah champion lai Services chuan inelna thlengtu Goa chu 1-2 a hneh loin an tla.
Thawhṭanni tlai Group A inkhel dangah vawi 31 champion tawh West Bengal-in semifinal an luh chian hnuah tha an thlah lo a, group match hnuhnung berah Meghalaya 2-0 in an hneh - Group A hmahruaitu an ni a, semi final-ah Mizoram nen an inhmachhawn ang.
West Bengal hi group match vawi thum an khelhah goal an chhuah lo a, final round-a goal chhuah lo awm chhun an ni. Coach Mridul Kanti Banerjee hnuaia khel team tan Shaikhom Ronald Singh-a'n minute kuana lekah Meghalaya lamah a khung a, Manvir Singh-a'n minute 85-naah chak nemnghehna a khung.
West Bengal forward Manvir hi Punjab tana goal hnih khungtu nen ngaih pawlh loh tur a ni.
Champion lai Services-in semifinal lut turin chak an mamawh a, Goa lakah Arjun Tudu hmangin minute riat lekah hma an hruai bawk. Amaehrawhchu inelna thlengtu Goa a tawpah an harh chhuak a, minute sarih chiah a awm tawh tihin Akeraj Martins hmangin an si phurh an sut a, draw hian semi final an lut thei - point thum hmu turin Cajetan Fernandes-a'n Goa chakna goal a khung zui bawk a ni.
Inelna thlirna tawi
Group A
March 20, Thawhṭanni
West Bengal 2 - 0 Meghalaya
WEB : Shaikhom Ronald Singh 9'; Manvir Singh 85'
Services 1 - 2 Goa
SER : Arjun Tudu 8'
GOA : Akeraj Martins 83'; Cajetan Fernandes 89'
# Team Pld W D L GF GA GD Pts
1 West Bengal 4 3 1 0 4 0 4 10
2 Goa 4 2 2 0 5 3 2 8
3 Chandigarh 4 1 1 2 3 4 -1 4
4 Meghalaya 4 1 0 3 4 6 -2 3
5 Services 4 1 0 3 2 5 -3 3
Group B
Mizoram 5 - 1 Railways
MIZ : V. Lalchhuanawma 24'; F. Lalrinpuia 59', 84';
Lalrinchhana 70'; Lalsangbera 77' (P)
RAI : Rajesh Soosanayakam 42'
Maharashtra 2 - 0 Kerala
Team Dinhmun
# Team Pld W D L GF GA GD Pts
1 Kerala 4 2 1 1 10 7 3 7
2 Mizoram 4 2 1 1 9 6 3 7
3 Punjab 4 1 2 1 4 4 0 5
4 Railways 4 1 0 3 5 11 -6 3
5 Maharashtra 4 1 0 3 4 4 0 3