TOISA 2016 Footballer of the year Mizo hming timawitu Jeje

Mizo tlangval Jeje Lalpekhlua chu Times of India Sports Awards 2016-ah Footballer of the Year-ah thlan a ni a, he chawimawina dawng tur hian India captain Sunil Chhetri a khum.

Khawvel huapa english chanchinbu darhzau ber Times of India chuan TOI Sports Award 2016 hi Thawhṭanni zan khan JW Marriott Hotel, Mumbai-ah a sem a, Jeje hi kum 2016 chhunga a record duhawm tak avangin footballer ṭha berah thlan a ni.

Kum ṭha

Jeje-a'n kum 2016 a thlir kir apiangin chhuang takin a thlir kir ṭhin tawh ang. Mizo tlangval tan 2016 hi kum ṭha a ni a, SAFF Championship final-ah goal khunga India champion puiin kum bul a ṭan. Mizo tlangvalin India rama ropui mai a duhtawk lo - AFC Champions League leh AFC Cup inelnaah goal sarih a khung a, khawmualpui huap club inelnaa season khata Indian player goal khung hnem ber a ni.

Jeje-a'n I League-ah Mohun Bagan tan match 14 khelin goal li a khung a, pahnihna a nihpui. Federation Cup-ah Kolkata club an champion a, Jeje-a'n match nga a khelhah goal riat khungin Fed Cup tournament khata goal khung hnem ber record a siam. India tan kum 2016 chhungin match ruk a khelhah goal ruk a khung bawk. Indian Super League-ah Jeje-a'n hliam vangin match kua bak a khel lo a, goal thum a khung tling tho.

Chawimawi rawh u!

Mizo tlangval Jeje Lalpekhlua'n 'kum ṭha' a hmang mek tih Indian football-in an hmuh hmaih lo. Football Players Association of India chuan Hnahthial tlangval hi an zinga thiam berah an ngai a, Indian Player of the Year 2016 atan an thlang. AIFF chuan Mizoram aṭanga India captain ni hmasa ber hi AIFF Player of the Year-ah an thlang bawk a, tunah chuan a chawimawina dawhkanah TOISA 2016 Footballer of the Year award hun belh tur a nei leh ta.

TOISA awards jury panga zinga mi Bhaichung Bhutia chuan, "Jeje hi Indian football-ah chuan hming langsar ber a ni a, hmabak eng tak a la nei bawk. Tournament a telna apiangah top scorer a ni zel em ni chu aw tih tur khawpin a khel ṭha a, hei hian a theihna a hrilhfiah chiang hle. Tun dinhmunah chuan Indian football-a ṭha ber chu Jeje-a ni," tiin Mizo tlangval a dah sang hle.

Jeje tan Mizo

Cambodia-a India tana feh chhuak mek Jeje chuan, "Awards dawng tur thlang chhuaktu jury ten he chawimawina dawng tlaka min ngai hi ka lawm a, chutihrualin hmun hrang hranga Mizo awmten ṭhahnem ngaia min lo vote vek avangin lawmthu ka sawi tak meuh meuh a ni," tiin Vanglaini palai hnenah a sawi.

izo tlangval Jeje chuan, "Award dawn hi thil awlsam tak a ni lo a, India rama footballer ṭha ber nih phei chu a awlsam lo lehzual. Heng zawng zawng hi Mizo mipuite min thlawpna vang a ni tih ka hria a, an chungah ka lawm takmeuh a ni," tiin lawmthu a sawi bang lo.

TOISA Awards 2016
Sportsperson
of the Year PV Sindhu
Athletics Lalita Babar
Archery Atanu Das
Badminton PV Sindhu
Billiards Pankaj Advani
Boxing Vikas Krishan
Chess Harika Dronavalli
Cricket Ravichandran Ashwin
Football Jeje Lalpekhlua
Gymnastics Dipa Karmakar
Golf Anirban Lahiri
Hockey Rupinder Pal Singh
Kabbadi Ajay Thakur
Rowing Dattu Baban Bhokanal
Squash Dipika Pallikal Karthik
Shooting Abhinav Bindra
Tennis Sania Mirza
Wrestling Sakshi Malik
Emerging Player
of the Year Rishabh Pant (Cricket)
Team of the Year India junior men's hockey team
Coach of the Year P Gopichand & Bisheshwar Nandi
State of the Year Haryana
Lifetime
Achievement Award Ajit Pal Singh (Hockey)
Paralympians Devendra Jhajharia, Deepa Malik, Mariyappan Thangavelu,
Varun Bhati